ក្រុមអាជ្ញាធរសុខាភិបាលចិន បានព្រមានកាលពីថ្ងៃអាទិត្យអំពីការផ្ទុះរាលដាលឡើងវិញ នៃវីរុស COVID-19 នៅក្នុងខែមករានេះ ដែលជំរុញដោយការកើនឡើងនៃសាខាប្រភេទជំងឺថ្មី នៃ​វីរុស​បម្លែង​ខ្លួន JN.1 ។ 

ខណៈ​អត្រាករណីឆ្លងបច្ចុប្បន្ននៅតែមានកម្រិតទាប និងអត្រា​តេស្តវិជ្ជមាន​ក្រោម​មួយ​ភាគរយ​នៅ​ចំនុច​តាមដាននានា គណៈកម្មការសុខភាពជាតិ (NHC) បានគូស​បញ្ជាក់​ពី​ការ​កើនឡើង នៃ​វត្តមាន​របស់វីរុសបម្លែងខ្លួនថ្មី JN.1 ។

លោក Wang Dayan ប្រធានមជ្ឈមណ្ឌល​ជំងឺគ្រុនផ្តាសាយជាតិចិន​បាន​និយាយ​នៅ​ក្នុង​សន្និសីទ​សារព័ត៌មាន NHC ថា អ្នកជំនាញបាន​សន្និដ្ឋាន​ថា​ជំងឺ​ផ្លូវ​ដង្ហើម​ជា​ច្រើនទំ​នង​ជា​នឹង​រីក​រាល​ដាល​នៅរដូវរងានេះនិងនិទាឃរដូវក្រោយ។ ជំងឺគ្រុនផ្តាសាយ​ត្រូវ​បាន​គេរំពឹងថា នឹង​នៅតែ​ជា​ភ្នាក់​ងារ​បង្ករោគដ៏សកម្ម។ 

លោក Wang បានសន្មតថាការកើនឡើងនៃវីរុសបម្លែងខ្លួនថ្មី JN.1 បណ្ដាលមក​ពី​កត្តា​ជា​ច្រើន​ដូច​ជា​ករណី​នាំចូល អត្រាជំងឺផ្តាសាយទាប និងការថយចុះភាពស៊ាំរបស់ប្រជាជន។

ក្រុម​អាជ្ញាធរគ្រប់គ្រងជំងឺឆ្លងរបស់សហរដ្ឋអាមេរិកបានប៉ាន់ប្រមាណថា វីរុស JN.1 មានប្រហែល ៦២ ភាគរយនៃករណីឆ្លងនៅទូទាំងប្រទេស ហើយ​បាន​ក៏​ឆ្លង​រាលដាល​ខ្លាំង​បំផុត​នៅ​អឺរ៉ុប​ផង​ដែរ​។      

ទោះបីជាមានបន្ទុកវីរុស COVID-19 បច្ចុប្បន្នទាបក៏ដោយ មន្ទីរពេទ្យ​ចិន​កំពុង​ត្រៀម​សម្រាប់​ការ​កើន​ឡើង​ខ្លាំងនៃករណីឆ្លង។  លោក Wang Guiqiang ប្រធាននាយកដ្ឋាន​ជំងឺ​ឆ្លង​នៅ​មន្ទីរ​ពេទ្យ​ទីមួយ នៃសាកលវិទ្យាល័យ Peking University បាន​គូស​បញ្ជាក់​ពី​វិធានការ​ដូច​ជា​ការ​បង្កើន​កម្ម​វិធីបណ្តុះបណ្តាល ការកែប្រែការបែងចែកធនធានមនុស្ស និងការប្រើប្រាស់​បច្ចេក​វិទ្យា​ដើម្បី​សម្រួ​លដំណើរការ៕