រដ្ឋមន្ត្រីការបរទេសចិន លោក វ៉ាង យី (Wang Yi) បាននិយាយកាលពីថ្ងៃអាទិត្យថា លទ្ធផល នៃ​ការ​បោះឆ្នោតជ្រើសរើសមេដឹកនាំនៅក្នុងតំបន់តៃវ៉ាន់ មិនអាចផ្លាស់ប្តូរការពិតជាមូលដ្ឋានថា មាន​ចិនតែមួយនៅក្នុងពិភពលោក ហើយតៃវ៉ាន់គឺជាផ្នែករបស់ប្រទេសចិន។

លោក Wang ក៏ជាសមាជិក នៃការិយាល័យ​នយោបាយ នៃ​គណៈកម្មាធិការ​មជ្ឈិម​បក្ស​កុម្មុយ​និស្តចិន​បាន​ធ្វើអត្ថាធិប្បាយ​ក្នុង​សន្និសីទ​សារព័ត៌មាន​មួយ​បន្ទាប់​ពី​លោក​បាន​ជួប​ជាមួយ​រដ្ឋមន្ត្រីការ​បរទេសអេហ្ស៊ីប លោក Sameh Shoukry នៅរដ្ឋធានី គែរ(Cairo)ប្រទេសអេហ្ស៊ីប។

លោកបាននិយាយថា លទ្ធផលនៃការបោះឆ្នោតជ្រើសរើសមេដឹកនាំនាពេលថ្មីៗនេះ នៅ​ក្នុង​តំបន់​តៃវ៉ាន់ ក៏នឹងមិនផ្លាស់ប្តូរការយល់ស្រប​ទូទៅ​របស់​សហគមន៍​អន្តរជាតិ​ស្តីពី​ការ​ប្រកាន់​ខ្ជាប់​នូវ​គោលការណ៍​ចិនតែមួយនោះទេ។ 

លោក Wang បានគូសបញ្ជាក់ថាកាលពី ៨០ ឆ្នាំមុននៅទីក្រុងគែរ ប្រទេសចិន សហរដ្ឋអាមេរិក និង​ចក្រ​ភពអង់គ្លេសបានចេញសេចក្តីប្រកាសទីក្រុងគែរ ដែលបាន​បញ្ជាក់​យ៉ាង​ច្បាស់ថា​ទឹកដី​ទាំងអស់​ដែលជប៉ុនបានលួចពីប្រទេសចិន រួមទាំងកោះតៃវ៉ាន់ គួរតែត្រូវ​បាន​ប្រគល់​ឱ្យ​ប្រទេស​ចិន​វិញ។ 

លោក Wang បាននិយាយថា ឯកសារជាបន្តបន្ទាប់​ដែល​មាន​ឥទ្ធិពល​ផ្លូវ​ច្បាប់​អន្តរជាតិ​បាន​បង្កើត​ជា​ផ្នែក​សំខាន់មួយនៃសណ្តាប់ធ្នាប់អន្តរជាតិក្រោយសង្គ្រាម ហើយបានដាក់​មូល​ដ្ឋាន​គ្រឹះ​ជា​ប្រវត្តិសាស្ត្រ និងផ្លូវច្បាប់ថាតៃវ៉ាន់ គឺជាទឹកដីដែលមិនអាចកាត់ផ្តាច់បានរបស់ប្រទេសចិន៕