ក្រសួងការបរទេសរបស់ប្រទេសចិន និងស្ថានទូតរបស់ខ្លួនជុំវិញពិភពលោក បាន​ថ្កោល​ទោស​រដ្ឋាភិបាល​បរទេស​ដែលបានអបអរសាទរគណបក្សប្រជាធិបតេយ្យជឿនលឿន (DPP) របស់​កោះតៃវ៉ាន់ និងមេដឹកនាំជាប់ឆ្នោតលោក ឡៃ ឈីងតឺ (Lai Ching-te) បន្ទាប់​ពី​ការ​បោះឆ្នោត​កាល​ពី​ថ្ងៃ​សៅរ៍។

បន្ទាប់​ពីបេក្ខជនមេដឹកនាំរបស់បក្សប្រជាធិបតេយ្យជឿនលឿន DPP លោក ឡៃ បាន​ឈ្នះ​ការ​បោះឆ្នោត បណ្ដារដ្ឋមន្ត្រី និងអ្នកនយោបាយមួយចំនួននៅក្នុងប្រទេស ដែល​ភាគ​ច្រើន​មាន​ទំនាក់​ទំនង​មិន​ផ្លូវ​ការជាមួយកោះស្វ័យគ្រប់គ្រងនេះ បានផ្ញើសារអបអរសាទរទៅកាន់លោក ឡៃ និង​បក្ស DPP ជុំវិញជ័យជម្នះរបស់ពួកគេ។

សារអបអរទាំងនេះបានទាក់ទាញការឆ្លើយតបយ៉ាងរហ័សពីស្ថានទូតចិន ដោយ​បង្ហាញ​ពី​ភាព​រសើប​របស់​ទីក្រុងប៉េកាំង ចំពោះប្រទេស​ផ្សេង​ទៀត​ដែល​ហាក់​ដូច​ជា​ផ្តល់​ភាព​ស្រប​ច្បាប់​ដល់​បេក្ខជន និងគណបក្សនយោបាយដែលខ្លួនចាត់ទុកថាជា «កងកម្លាំងផ្ដាច់ខ្លួន» ដោយ​សង្ឃឹម​ថា​នឹ​ង​ប្រែក្លាយកោះតៃវ៉ាន់ ដែលចិនអះអាងសិទ្ធថារបស់ខ្លួន ជារដ្ឋមានអធិបតេយ្យភាពឯករាជ្យ។

ក្រសួងការបរទេសចិន កាលពីថ្ងៃអាទិត្យ បានពណ៌​នា​សេចក្តី​ថ្លែង​ការណ៍​របស់​រដ្ឋ​មន្ត្រី​ការ​បរទេស​អាមេរិ​កលោក អាន់តូនី ប្លីងខិន (Anthony Blinken) ថាជា «ការបញ្ជូន​សញ្ញា​មិន​ត្រឹម​ត្រូវ​យ៉ាង​ធ្ងន់ធ្ងរ​» ទៅកាន់ «កងកម្លាំងផ្ដាច់ខ្លួនឯករាជ្យរបស់កោះតៃវ៉ាន់» ខណៈ​ដែល​បាន​ថ្កោល​ទោស​នូវ​អ្វីដែ​ល​ខ្លួនហៅថា «សកម្មភាពមិនត្រឹមត្រូវ» របស់រដ្ឋមន្ត្រីការបរទេសអង់គ្លេស លោក ដេវីត កាមេរ៉ូន (David Cameron) ចំពោះការអបអររបស់លោកដល់លោក ឡៃ។

ស្ថានទូតចិនប្រចាំប្រទេសជប៉ុន បានទៅដល់ទីស្នាក់ការតំណាង ដែលជា​ទម្រង់​នៃ​ការ​តវ៉ា​ការ​ទូត​ជា​ផ្លូវការ បន្ទាប់ពីរដ្ឋមន្ត្រីការបរទេសជប៉ុន លោក យ៉ូកូ កាមីកាវ៉ា (Yoko Kamikawa) បាន​អបអរ​សាទរចំពោះជ័យជម្នះរបស់មេដឹកនាំជាប់ឆ្នោតថ្មីរបស់កោះតៃវ៉ាន់៕