លោក ហ្សាក់ ប៉ឺឡេ ឯកអគ្គរដ្ឋទូតបារាំងប្រចាំនៅកម្ពុជា បានថ្លែងថា តាមការមើលឃើញរបស់លោក ចំពោះការដឹកនាំរបស់មន្រ្តីក្នុងជួររាជរដ្ឋាភិបាលវ័យក្មេងកម្ពុជា ក្នុងរយៈពេលជាងបួនខែមកនេះ គឺមាន ឆន្ទៈខ្ពស់ក្នុងការកែទម្រង់ទាំងថ្នាក់ជាតិ ​និងថ្នាក់ក្រោមជាតិ ហើយលោករំពឹងថា ការប្តេជ្ញាចិត្តរបស់រាជរដ្ឋាភិបាលនេះ នឹងធ្វើឲ្យកម្ពុជាកាន់តែប្រសើរ រួមទាំងការពង្រឹងទំនាក់ទំនងទ្វេភាគីជាមួយបារាំងផងដែរ។

ថ្លែងក្នុងសន្និសីទសារព័ត៌មាន ​នាថ្ងៃទី១៥ ខែមករា ឆ្នាំ២០២៤នេះក្នុងស្ថានទូបារាំង ស្តីពី​ដំណើរទស្សនកិច្ចរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ទៅកាន់ប្រទេសបារាំង លោក ហ្សាក់ ប៉ឺឡេ បានបញ្ជាក់ថា ក្រោយកាន់តំណែងរបស់​នាយករដ្ឋមន្រ្តីវ័យក្មេងកម្ពុជា​នីតិកាលទី៧ ក្នុងរដ្ឋសភាអស់ រយៈពេលប៉ុន្មានខែមកនេះ លោកបានជួបរដ្ឋមន្រ្តីជាច្រើន​ដែល​ទើបតែងតាំងព្រមគ្នា ហើយក្នុងកិច្ចជំនួបនោះរដ្ឋមន្រ្តីទាំងនោះ​សុទ្ធតែ​មានឆន្ទៈ​មុះ មុត​ក្នុងការធ្វើកំណែទម្រង់របស់ខ្លួន ​ដើម្បីផលប្រយោជន៍រួម​ របស់ប្រជាជន និងប្រទេសជាតិ។

នៅក្នុងសន្និសីទសារព័ត៌មាននោះដែរ ​លោកឯកអគ្គរដ្ឋទូតបារាំងក៏បានសម្តែងនូវ​សុទិដ្ឋិនិយម ផងដែរ​ចំពោះដំណើរទស្សនកិច្ចរបស់សម្តេចធិបតី ​ហ៊ុន ម៉ាណែត ​នាយករដ្ឋមន្រ្តីទៅកាន់​ប្រទេស​បារំាង​ជាផ្លូវការ ​និងជាលើកដំបូងនាពេលនេះ នឹងធ្វើឲ្យទំនាក់ទំនងទ្វេក្នុងក្របខណ្ឌ​ភាគីកម្ពុជា និងបារាំងកាន់តែល្អប្រសើរ ​បន្ថែមទៀត​ ជាពិសេសនោះគឺវិស័យសេដ្ឋកិច្ច ខណៈបារាំងមើលឃើញ​កម្ពុជាមានស្ថានភាពល្អប្រសើរជាច្រើន ​ដែលគួរឲ្យអ្នកវិនិយោគិនបារាំងមកធ្វើការវិនិយោគ​នៅកម្ពុជាបន្ថែម៕អត្ថបទបាន ចក់