ភ្នំពេញ៖ ប្រធានប្រតិភូនៃសាធារណរដ្ឋប្រជាមានិតចិនក្រៅពីកោតសសើរនិងសាទរដល់អង្គភាពស៊ីម៉ាក់ដែលប្រឹងប្រែងលើការងារបោសសំអាតមីននិងគ្រាប់យុទ្ធភណ្ឌមិន ទាន់ផ្ទុះគ្រប់ប្រភេទ ដើម្បីសម្រេចគោលដៅផែនការចង់បានរបស់រាជរដ្ឋាភិបាលកម្ពុជានោះ ។ ភាគីចិនក៍បានប្រកាសបន្តផ្តល់ជំនួយដល់កម្ពុជាជានិច្ច នូវរាល់តម្រូវការ ដើម្បីជួយឲ្យផ្ទៃដីកម្ពុជាអស់មីន លែងមានមនុស្សនិងសត្វរងគ្រោះថ្នាក់របួសពិការឬបាត់បង់ជីវិតបន្តទៅទៀតនោះ។

ការប្រកាសបន្តផ្តល់ជាជំនួយដល់កម្ពុជាយ៉ាងដូច្នេះក្នុងខណះ ត្រូវបានឯកឧត្តម ហេង រតនា ប្រតិភូរាជរដ្ឋាភិបាល ទទួល បន្ទុកជាអគ្គនាយកស៊ីម៉ាក់ទទួលជួបពិភាក្សាការងារគ្នាជាមួយគណៈប្រតិភូសាធារណរដ្ឋប្រជាមានិតចិននេះដែលដឹកនាំដោយលោក ម៉ា ហ្សេងគាន់ (Ma Sheng kun ) អគ្គនាយករង អគ្គនាយកដ្ឋានគ្រប់គ្រងអាវុធក្រសួងការបរទេសនៃសាធារណរដ្ឋប្រជាមានិតចិន នៅមជ្ឍមណ្ឌលកំចាត់មីនកម្ពុជា(ស៊ីម៉ាក់) នាថ្ងៃទី១៥ ខែមករា ឆ្នាំ២០២៤ នេះ ។

ក្នុងជំនួបពិភាក្សាការងារនេះ ឯក ឧត្តម ហេង រតនា ជម្រាបជូនលោក Ma Shengkunអំពីប្រវត្តិសាវតានិងសកម្ម ភាពស្នូលរបស់អង្គភាព ស៊ីម៉ាក់ក្នុងការបោសសម្អាតមីន និងគ្រាប់យុទ្ធភណ្ឌមិនទាន់ផ្ទុះក្នុងការដោះស្រាយវិបត្តិសំណល់ជាតិផ្ទុះពីសង្គ្រាមនៅកម្ពុជា និងសមិទ្ធផលគម្រោង លុបបំបាត់គ្រាប់មីននៅកម្ពុជា ដែលជាជំនួយឥត សំណងរបស់សាធារណរដ្ឋប្រជាមានិតចិនផ្តល់ជូនរាជ រដ្ឋាភិបាលកម្ពុជាចាប់តាំងពីឆ្នាំ២០១៨រហូតមកដល់ពេលបច្ចុប្បន្ន។ ជាការឆ្លើយតបលោក ម៉ា ហ្សេងគាន់ បានសម្តែងនូវការអបអរសាទរ នូវទំនាក់ទំនងនិងកិច្ចសហ ប្រតិបត្តិការ រវាងកម្ពុជា-ចិន និងបានកោតសរសើរដល់កម្លាំងបោសសម្អាតមីនអង្គភាពស៊ីម៉ាក់និងប្រកាសរង់ចាំផ្តល់ជាជំនួយគាំទ្រដើម្បីឆ្លើយតបទៅនឹងតម្រូវការចាំបាច់បន្ថែមទៀតក្នុងការបោសសម្អាតមីន ដើម្បីផ្តល់ដីសុវត្ថិភាពដល់ប្រជាពលរដ្ឋនៅតំបន់ដែលរងគ្រោះ តាមរយៈជំនួយ ឥតសំណងរបស់ប្រទេសចិន ដែលបានរួមចំណែកធ្វើឱ្យប្រសើរឡើងវិញក្នុងការកសាងហេដ្ឋារចនាសម្ព័ន្ធរូបវ័ន្តនៅក្នុងខេត្តគោលដៅនានានោះ ៕ អត្ថបទ ៖ ភារម្យ