បណ្តាញអង្គការសត្វព្រៃ និងក្រសួងបរិស្ថាន នៅថ្ងៃទី១៥ ខែមករានេះ បានរៀបចំ មហោ​ស្រព​សត្វ​ស្លាប និងធម្មជាតិឆ្នាំ២០២៤ នៅសកលវិទ្យាល័យភូមិន្ទកសិកម្ម ដែល​មហោ​ស្រព​សត្វ​ស្លាប​នេះ គឺមានគោលបំណងសំខាន់ៗ អំពាវនាវពលរដ្ឋទាំងអស់គ្នា បញ្ឈប់ការបរិភោគសាច់សត្វព្រៃ សត្វ​ស្លាប និងសូមបញ្ឈប់ការដាក់អន្ទាក់ និងថ្នាំពុលនានា នាំឲ្យ​ប៉ះ​ពាល​ការ​រស់​រាន​មាន​ជីវិ​ត​សត្វ​ព្រៃ។

លោក ប៊ូ វរសក្ស ប្រធានអង្គការជីវិតធម្មជាតិនៅកម្ពុជា ថ្លែងថា បច្ចុប្បន្ន​មាន​ជីវិត​សត្វ​ស្លាប​ប្រមាណ​ជាង ៦០០ប្រភេទ ដែលកម្ពុជា បានធ្វើកត់ត្រាបាននៅទូទាំងប្រទេស ក្នុង​នោះមា​ន​សត្វ​ស្លាប​មួយ​ចំនួនកំពុងមានការកើនឡើង ហើយក៏មានខ្លះជិតផុតពូជ ដែលទាមទារ​ឲ្យ​យើង​ទាំង​អស់​គ្នារួម​គ្នាអភិរក្ស បញ្ឈប់ការហូបសាច់សត្វព្រៃ។

លោក សាន់ ស៊ីកុល តំណាងមកពីសមាគមន៍មគ្គុទេសក៏សត្វស្លាបកម្ពុជា បានថ្លែងថា បច្ចុប្បន្ន​នៅ​កម្ពុជា មានគោលដោទេសចរណ៍ទស្សនាសត្វស្លាបប្រមាណ៤០កន្លែង មានការទា​ក់​ទាញ​ភ្ញៀវ​ទេសចរអន្តរជាតិទៅទស្សនា ជាពិសេសការទស្សនាតំបន់ប្រភេទសត្វស្លាបកម្រ  ហើយ​លោក​ក៏​អំពាវនាវពលរដ្ឋសូមគ្នាអភិរក្សសត្វកម្រទាំងនោះ ដើម្បីទុកឲ្យភ្ញៀវទេសចរទៅទស្សនា និង​លើកកម្ពស់ជីវភាពបានយូរអង្វែង។

លោក ស្រី ស៊ុនលាង អគ្គនាយករង អគ្គនាយកដ្ឋានតំបន់ការពារធម្មជាតិ នៃក្រសួង​បរិស្ថាន​ថ្លែង​ថា ការអភិរក្សសត្វព្រៃ នឹងមិនមានភាពជោគជ័យទេ ប្រសិនបើពលរដ្ឋ និងភាគីពាក់ព័ន្ធ មិន​ចូល​រួម​សហការថែរក្សា ការពារ អភិរក្សសត្វព្រៃ ។ តាមរយៈអនុវត្តយុទ្ធនាអន្ទាក់សូន្យកន្លងមក បានធ្វើអោយការប្រមាញ់ ការបរបាញ់ ការ​ដាក់អន្ទាក់ និងការជួញដូរចែកចាយលក់សាច់សត្វព្រៃ នៅ​តាម​ភោជនីយដ្ឋាន​ហាក់​បាន​ថយ​ចុះ​ខ្លាំង ហើយបានផ្លាស់ប្តូរឥរិយាបថរបស់ពលរដ្ឋ ចូលរួមថែរក្សាអភិរក្សសត្វព្រៃ ទុកជូន​ភ្ញៀវ​ទេសច​រ​ទៅ​ទស្សនាកម្សាន្ត និងការកម្ពស់ជីវភាពសហគមន៍បានល្អប្រសើរផងដែរ៕ អត្ថបទ៖ ស៊ុម សុខជា