ប្រទេសកាតា ហាក់ដូចជាបានផ្អាកការបញ្ជូននាវាដឹកឧស្ម័នធម្មជាតិរាវឆ្លងកាត់ច្រកសមុទ្រ Bab el-Mandeb បន្ទាប់ពីមានការវាយប្រហារតាមអាកាសដឹកនាំដោយសហរដ្ឋអាមេរិកលើគោលដៅរបស់ក្រុម ឧទ្ទាមហួទីក្នុងប្រទេសយេម៉ែន បានបង្កើនហានិភ័យ នៅក្នុងផ្លូវទឹកដ៏សំខាន់នេះ។

យោងតាមទិន្នន័យតាមដាននាវាដែលចងក្រងដោយសារព័ត៌មាន Bloomberg បានឲ្យដឹងថា យ៉ាងហោចណាស់នាវាដឹកឧស្ម័នរាវ (LNG) ចំនួន៥គ្រឿង ដែលដំណើរការដោយប្រទេសកាតា ដែលកំពុងធ្វើដំណើរឆ្ពោះទៅកាន់ការឆ្លងកាត់នៅចុងខាងត្បូងនៃសមុទ្រក្រហម ត្រូវបានផ្អាក ចាប់តាំងពីថ្ងៃសុក្រ។ ការផ្អាករយៈពេលយូរនៅក្នុងការផ្គត់ផ្គង់ពីអ្នកផ្តល់សេវា LNG ធំជាងគេទីពីររបស់អឺរ៉ុប បង្កើនហានិភ័យ ខណៈពេលដែលអាកាសធាតុរដូវរងា បានរួបរឹតទ្វីបនេះ។

ទោះយ៉ាងណាក៏ដោយ វាមិនទំនងជានាំឲ្យមានការខ្វះខាតណាមួយក្នុងរយៈពេលដ៏ខ្លីនោះទេ។ អឺរ៉ុបមានស្តុកទុកល្អ ហើយតម្រូវការឧស្សាហកម្ម នៅតែធ្លាក់ចុះ។ តម្លៃឧស្ម័នស្តង់ដាអឺរ៉ុប បានធ្លាក់ចុះ ៣,៧ ភាគរយ កាលពីថ្ងៃចន្ទ ហើយកំពុងជួញដូរនៅជិតកម្រិតទាបបំផុត ចាប់តាំងពីខែសីហា។

នាវាដឹកប្រេងចំនួនបីគ្រឿង ដែលដឹកឧស្ម័នរាវ (LNG) ទៅកាន់អឺរ៉ុប បានផ្អាកនៅឆ្នេរសមុទ្រអូម៉ង់។ នាវាទទេពីរផ្សេងទៀតដែលធ្វើដំណើរត្រឡប់ទៅប្រទេសកាតា ដើម្បីផ្ទុកឡើងវិញ បានឈប់នៅម្ខាងទៀតនៃ សមុទ្រ Bab el-Mandab គឺច្រកមួយនៅសមុទ្រក្រហម និងមួយទៀត នៅសមុទ្រមេឌីទែរ៉ាណេ នៅជិតព្រែកជីកស៊ុយអេ (Suez Canal)។