ភ្នំពេញ ៖ កអគ្គរដ្ឋទូតបារាំងប្រចាំនៅកម្ពុជា លោក ហ្សាក់ ប៉ឺឡេ បានថ្លែងថា រដ្ឋាភិបាលបារាំងគ្មានភាពចាំបាច់អ្វី លើកយកកិច្ចព្រមព្រៀងទីក្រុងប៉ារីស២៣តុលា ឆ្នាំ១៩៩១មកនិយាយទៀតនោះទេ នៅក្នុងកិច្ចជំនួបជាមួយសម្តេចធិបតី ហ៊ុន ម៉ាណែត នាពេលខាងមុខ ពីព្រោះថ្ងៃ២៣តុលា គឺជាកិច្ចព្រមព្រៀង មិនមែនអនុសញ្ញាដែលបារាំងត្រូវតាមដាន ឬត្រួតពិនិត្យជាប្រចាំនោះឡើយ ខណៈកិច្ចព្រមព្រៀង២៣តុលានេះក៏ត្រូវបានរាជរដ្ឋាភិបាលកម្ពុជា ដាក់បញ្ចូលក្នុងច្បាប់រដ្ឋធម្មនុញ្ញរបស់ខ្លួនផងដែរ។

ឆ្លើយតបទៅនឹងអ្នកសារព័ត៌មានចោទសួរថា មានក្រុមអ្នកតាំងខ្លួនមួយក្តាប់តូចថា ជាក្រុមប្រឹក្សា«កិច្ចព្រមព្រៀងទីក្រុងប៉ារីស២៣តុលា»តៀមខ្លួនធ្វើការតវ៉ា ដោយជំរុញឲ្យប្រទេសបារាំងយកបញ្ហា សិទ្ធិមនុស្ស និងប្រជាធិបតេយ្យមកជជែកជាមួយសម្តេចធិបតី ក្នុងកិច្ចជំនួបជាមួយប្រធានាធិបតីបារាំង នាពេលខាងមុខនោះ ត្រូវបានលោក ហ្សាក់ ប៉ឺឡេ លើកឡើងថា « ដោយសារកិច្ចព្រមព្រៀងទីក្រុងប៉ារីស វាមិនមែនជាអនុសញ្ញាអ្វីមួយទេ… បានន័យថាគេមិនទាមទាឲ្យមានការត្រួតពិនិត្យជាប្រចាំថាតើត្រូវបាន អនុវត្តត្រឹមត្រូវដែរ ឬក៏អត់ដូចជាអនុសញ្ញាទេ? មួយទៀតគោលការណ៍ធំៗនៃកិច្ចព្រមព្រៀងទីក្រុងប៉ារីស ត្រូវបានដាក់បញ្ចូលទៅក្នុងរដ្ឋធម្មនុញ្ញកម្ពុជារួចរាល់ហើយ គឺបទបញ្ញាតនានាហ្នឹងក៏យើងសង្កេត ឃើញថាមាននៅក្នុងរដ្ឋធម្មនុញ្ញដែរ។ ជាងនេះទៅទៀតយើងមានកិច្ចសន្ទនាជាច្រើនធ្វើឡើងកម្រិតខ្ពស់ដើម្បី ពិភាក្សាលើបញ្ហានានាទាក់ទងនឹងកិច្ចព្រមព្រៀងទីក្រុងប៉ារីសនេះ»។

 ជាមួយគ្នានោះដែរ លោកឯកអគ្គរដ្ឋទូតបារាំងប្រចាំនៅកម្ពុជា ក៏បានអះអាងផងដែរថា នៅក្នុងកិច្ច ជំនួបរវាងសម្តេចធិបតី ហ៊ុន ម៉ាណែត ជាមួយប្រធានាធិបតីបារាំងលោក ម៉ាណូអែល ម៉ាក្រុងនាពេលខាង មុខនេះ ក៏នឹងមិនលើកបញ្ហាលោកកឹម សុខា មកនិយាយនោះដែរ ដោយលោកបន្ថែមទៀតថាក្នុងដំណើរ ទស្សនកិច្ចផ្លូវការរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជាទៅប្រទេសបារាំងនេះ គឺមាន ភារកិច្ចធំៗជាច្រើនដើម្បីរឹតចំណងមិត្តភាពទ្វេភាគីកម្ពុជា និងបារាំងឲ្យកាន់តែល្អប្រសើរបន្ថែមទៀត ដើម្បី ផលប្រយោជន៍រួមរវាងរដ្ឋាភិបាល និងប្រជាជនទាំងពីរតងែប៉ុណ្ណោះ៕ អត្ថបទ ៖ បាន ចក់