ប្រមុខយោធាទីក្រុងម៉ានីល លោក Romeo Brawner នៅថ្ងៃចន្ទ (ទី១៥ ខែមករា) បានប្រាប់អ្នកសារព័ត៌មានថា ហ្វីលីពីននឹងអភិវឌ្ឍកោះនានា នៅសមុទ្រចិនខាងត្បូង ដែលខ្លួនចាត់ទុកថា ជាផ្នែកនៃទឹកដីរបស់ខ្លួន ដើម្បីធ្វើឲ្យកោះទាំងនោះក្លាយជាទីកន្លែងអាចស្នាក់នៅបានបន្ថែមទៀត សម្រាប់កងទ័ព។

ផែនការនេះកើតឡើងចំពេលដែលមានភាពតានតឹងកាន់តែខ្លាំងឡើង រវាងហ្វីលីពីន និងចិន ដែលប្រទេសទាំង២ ទាមទារទឹកដីនៅសមុទ្រចិនខាងត្បូង និងបានចោទប្រកាន់គ្នាទៅវិញទៅមកពីការមានអាកប្បកិរិយាអារិភាព នៅក្នុងផ្លូវទឹកយុទ្ធសាស្ត្រនេះ។

ទីក្រុងម៉ានីល និងទីក្រុងប៉េកាំង មានប្រវត្តិជម្លោះដែនសមុទ្រជាយូរលង់ នៅក្នុងផ្លូវទឹកនេះ ប៉ុន្តែទំនាក់ទំនងបានធ្លាក់ចុះយ៉ាងខ្លាំងនាពេលថ្មីៗនេះ ជុំវិញឧប្បត្តិហេតុជាបន្តបន្ទាប់ពាក់ព័ន្ធនឹងនាវាមកពីប្រទេសទាំង២។

ក្រៅពីតំបន់ថ្មប៉ប្រះទឹក Thomas Shoal ដែលត្រូវបានគេស្គាល់ឈ្មោះសាមញ្ញថា Ayungin ប្រទេសហ្វីលីពីនកាន់កាប់តំបន់ពិសេសចំនួន៨ ផ្សេងទៀត នៅក្នុងសមុទ្រចិនខាងត្បូង ហើយចាត់ទុកថា តំបន់ទាំងនោះជាផ្នែកនៃតំបន់សេដ្ឋកិច្ចផ្តាច់មុខរបស់ខ្លួន។

បន្ទាប់ពីចូលរួមសន្និសីទបញ្ជាការដឹកនាំដោយប្រធានាធិបតីហ្វីលីពីន លោក Ferdinand Marcos Jr នៅទីស្នាក់ការកណ្តាលយោធា លោក Brawner បាននិយាយថា៖ «យើងចង់ធ្វើឲ្យកោះទាំង៩ កាន់តែប្រសើរឡើង ជាពិសេសកោះដែលយើងកំពុងកាន់កាប់»។

តំបន់ពិសេសទាំងនោះ រួមមានកោះ Thitu ដែលជាកោះដ៏ធំ និងមានសារៈសំខាន់បំផុតជាយុទ្ធសាស្ត្រ នៅសមុទ្រចិនខាងត្បូង។ ដោយត្រូវបានគេស្គាល់សាមញ្ញថា Pag-asa កោះ Thitu ស្ថិតនៅចម្ងាយប្រហែល ៤៨០គីឡូម៉ែត្រភាគខាងលិចនៃខេត្ត Palawan របស់ប្រទេសហ្វីលីពីន៕