បន្ទាយមានជ័យ៖ កម្លាំងសមត្ថកិច្ចចាប់ឃាត់ខ្លួនមេខ្យល់ចំនួន ០២នាក់ ដែលកំពុងធ្វើសកម្មភាពបម្រុងលបលួចនាំពលករចំនួន ១១នាក់ ឆ្លងដែនចេញទៅប្រទេសថៃ ដើម្បីរកការងារធ្វើដោយខុសច្បាប់ ត្រូវបានកម្លាំងតំបន់ប្រតិបត្តិការសឹករងបន្ទាយមានជ័យ ចាប់ឃាត់ខ្លួនបានពេលចុះល្បាតនៅវេលាម៉ោង១២យប់រំលងអាធ្រាត្រឈានចូលថ្ងៃទី២៤ ខែមិថុនា ឆ្នាំ២០២១ ត្រង់ភូមិសាស្ត្រអូរព្រំដែន ភូមិល្វា ឃុំបឹងបេង ស្រុកម៉ាឡៃ ខេត្តបន្ទាយមានជ័យ។
ជាមួយគ្នានោះដែរ លោកឧត្តមសេនីយ៍ត្រី ជឹម ប៊ុនអាន មេបញ្ជាការប្រតិបត្តិការសឹករងខេត្តបន្ទាយមានជ័យ បានបញ្ជាឲ្យលោកវរសេនីយ៍ឯក រិទ្ធ រ៉ម មេបញ្ជាការរងតំបន់ប្រតិបត្តិការសឹករងបន្ទាយមានជ័យដឹកនាំកម្លាំងយោធា១ក្រុមចុះល្បាតជាប់ជាប្រចាំ ២៤ម៉ោងលើ២៤ម៉ោងសហការជាមួយកម្លាំងកងរាជអាវុធហត្ថស្រុក និងកម្លាំងផ្នែកសឹករងម៉ាឡៃ ដើម្បីទប់ស្កាត់រាល់បទល្មើសឆ្លងដែនផ្សេងៗ ក្នុងភូមិសាស្ត្រស្រុកម៉ាឡៃពិសេសនោះទប់ស្កាត់បទល្មើសពលករលួចឆ្លងដែនដោយខុសច្បាប់តាមរយៈក្រុមមេខ្យល់មួយចំនួនដែលនៅតែលបលួចបន្តធ្វើសកម្មភាពឆ្លងដែនគ្រប់រូបភាព ដើម្បីធ្វើការទប់ស្កាត់ឲ្យបានក្នុងដំណាកកាលកំពុងរីករាលដាលជំងឺកូវីដ-១៩ កុំឲ្យមានការឆ្លងចូលក្នុងសហគមន៍បន្តទៀត។
ក្នុងការចុះល្បាតនោះដែរ លោកវរសេនីយ៍ឯក រិទ្ធ រ៉ម បានបញ្ជាក់ឲ្យដឹងថា ខណៈពេលដែរកម្លាំងកំពុងធ្វើការចុះល្បាត ក៏បានប្រទះឃើញមេខ្យល់ចំនួន ០២នាក់នឹងពលករចំនួន ១១ស្រី២នាក់បម្រុងនាំពលករទាំងអស់នេះ ឆ្លងដែនចេញទៅប្រទេសថៃ ត្រូវបានកម្លាំងតំបន់ប្រតិបត្តិការសឹករងខេត្តបន្ទាយមានជ័យដោយមានការសង្ស័យនោះ ត្រូវបានធ្វើការឃាត់ខ្លួនភ្លាមៗផងដែរដើម្បីសាកសួរបន្ត។
លោកវរសេនីយ៍ បានបញ្ជាក់ថា មេខ្យល់ទាំង ០២នាក់ នោះ១.ឈ្មោះ នឿន សីហា ភេទប្រុស អាយុ ៣៩ឆ្នាំ រស់នៅភូមិត្រពាំងព្រលិត ឃុំសន្តិភាព ស្រុកសំពៅលូន ខេត្តបាត់ដំបង ២.ឈ្មោះ ឃន សុផាត ភេទប្រុស អាយុ ៣៩ឆ្នាំ រស់នៅភូមិអូល្វា ឃុំជ្រៃសីម៉ា ស្រុកសំពៅលូន ខេត្តបាត់ដំបង។
ក្រោយពីបានធ្វើការសាកសួរនាំរួចមក កម្លាំងតំបន់ប្រតិបត្តិការសឹករងបន្ទាយមានជ័យ បានប្រគល់មេខ្យល់ទាំង ០២នាក់ រួមទាំងពលករទាំង ១១នាក់ប្រគល់ឲ្យទៅឲ្យកម្លាំងអាវុធហត្ថស្រុក ដើម្បីចាត់ការតាមនីតិវិធីច្បាប់។
រីឯពលករទាំង ១១នាក់ ត្រូវបានបញ្ជូនទៅឲ្យធ្វើចត្តាឡីស័កចំនួន១៤ថ្ងៃ នៅមណ្ឌលចត្តាឡីស័កស្រុកម៉ាឡៃ ទើបអាចឲ្យត្រលប់ទៅមូលដ្ឋានរបស់ខ្លួនវិញ៕ អត្ថបទ៖ ឃិន សារិទ្ធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
