កោះ La Reunion (ឡា រឺនីយ៉ុង) របស់ប្រទេសបារាំង បានស្ថិតក្រោមការប្រកាសអាសន្នព្យុះស៊ីក្លូន នៅព្រឹកថ្ងៃចន្ទ (ទី១៥ ខែមករា) ហើយប្រជាពលរដ្ឋត្រូវបានជំរុញឲ្យស្នាក់នៅខាងក្នុងផ្ទះ ផ្ដាច់ចរន្ទអគ្គិសនី ឈប់ប្រើប្រាស់ទឹកម៉ាស៊ីន និងស្នាក់នៅក្នុងបន្ទប់ដែលមានសុវត្ថិភាពបំផុតនៃលំនៅឋានរបស់ខ្លួន ដោយសារព្យុះស៊ីក្លូនឈ្មោះ Belal (បេឡា)។

អាជ្ញាធរបាននិយាយថា មនុស្សគ្មានផ្ទះសម្បែងម្នាក់ ដែលមិននៅក្នុងទីជម្រកសុវត្ថិភាពនោះ បានស្លាប់ដោយសារខ្យល់ព្យុះនេះ ខណៈបានបន្ថែមថា មូលហេតុពិតប្រាកដនៃការស្លាប់មិនទាន់ត្រូវបានបញ្ជាក់នៅឡើយទេ។ ហើយអាជ្ញាធរបានសង្កត់ធ្ងន់ថា៖ «កុំចេញទៅក្រៅមិនថាមូលហេតុអ្វីក៏ដោយ ទោះបីជាអាកាសធាតុស្ងប់ស្ងាត់ហើយក្ដី។ នេះអាចផ្នែកនៃព្យុះស៊ីក្លូន»។

អ្នកប្រើប្រាស់បណ្ដាញសង្គម នៅព្រឹកថ្ងៃចន្ទនេះ បានបង្ហោះវីដេអូ ដែលបង្ហាញឲ្យឃើញពីខ្យល់បក់ និងភ្លៀងធ្លាក់ខ្លាំង ខណៈដែលការខូចខាតជាក់ស្តែង ដោយសារព្យុះស៊ីក្លូននេះ ដែលបានកើតមានតាមជួរមាត់សមុទ្រនៃកោះនេះ មិនទាន់ច្បាស់លាស់នៅឡើយទេ ភ្លាមៗនេះ។

នៅក្រោមការប្រកាសអាសន្ន ដែលហៅថា ការប្រកាសអាសន្នពណ៌ស្វាយ សូម្បីតែក្នុងស្ថានភាពធ្ងន់ធ្ងរបំផុត សេវាសង្គ្រោះបន្ទាន់របស់ប្រទេសបារាំង នៅលើកោះ ដែលស្ថិតនៅក្នុងមហាសមុទ្រឥណ្ឌាភាគខាងកើតនៃកោះម៉ាដាហ្គាស្ការ មិនត្រូវបានអនុញ្ញាតឲ្យចាកចេញពីមូលដ្ឋានរបស់ពួកគេទេ ចាប់ពីម៉ោង ៦ព្រឹក ម៉ោងក្នុងស្រុក៕