អ្នកសារព័ត៌មានជាច្រើននាក់ ក្នុងប្រទេសអេក្វាឌ័រ បានប្រកាន់យកវិធានការការពារខ្លួន ខណៈដែលប្រទេសនេះ បានរងផលប៉ះពាល់ពីការវាយប្រហាជាបន្ដបន្ទាប់ពីក្រុមអន្ធពាលប្រដាប់អាវុធ ក្នុងនោះរួមមានការវាយប្រហារដាក់គោលដៅលើស្ថានីយទូរទស្សន៍ក្នុងស្រុកTC ផងដែរ។

កាលពីថ្ងៃ៩មករា ខ្មាន់កាំភ្លើងបិទមុខ១ក្រុមបានសម្រុកចូលស្ទីយោរបស់ទូរទស្សន៍រដ្ឋCTក្នុងអំឡុងពេលផ្សាយផ្ទាល់ក្នុងក្រុងកំពង់ផែហ្គ័រយ៉ាគីល (Guayaquil) ដែលបង្ខំឲ្យបុគ្គលិកក្រាបទៅលើឥដ្ឋ 

ខណៈដែលបាញ់កាំភ្លើង និងសំលេងស្រែកត្រូវបានគេឮនៅក្នុងស្ទីយោនោះ។

នាងការ៉ូលីណា (Carolina) ជាអ្នកធ្វើការផ្នែកប្រព័ន្ធផ្សព្វផ្សាយក្នុងស្រុកបានប្រាប់ទូរទស្សន៍ CCTV ថា នាងបានស្ថិតនៅផ្ទះនៅថ្ងៃនោះ ជាពេលដែលនាងបានចាប់ផ្ដើមឃើញសារជាច្រើនដែលបានផ្ញើរទៅកាន់ ក្រុមព័ត៌មានរបស់នាង ដែលសហសេវិករបស់នាងបានស្នើសុំជំនួយនោះ។នាងបន្ដថា ជាដំបូង នាងស្មានតែជារឿងលេងសើច។ តាមពិតទៅ ពួកគេបានផ្ញើរសារទាំងស្រែកយំសុំជំនួយនិងបានស្នើសុំអោយយើង ទូរស័ព្ទហៅសមត្ថកិច្ចអោយបានឆាប់ខណៈដែលក្រុមខ្មាន់កាំភ្លើងចង់សម្លាប់ពួកគេនោះ។

នាងការ៉ូលីណា បាននិយាយថា នាងនិងអ្នកធ្វើការជាមួយគ្នាភ្លាមៗនោះ បានទូរស័ព្ទទៅកាន់បញ្ជាការនគបាល តំបន់៨ឬ(Zone Eight) ហើយសំណាងដែរ ដែលសមត្ថកិច្ចបានទៅដល់កន្លែងកើតហេតុភ្លាមៗ និងជួយសង្រ្គោះចំណាប់ខ្មាំងបានទាំងអស់។

ស្ថានីយទូរទស្សន៍ បានបន្ដប្រតិបត្ដការឡើងវិញជាធម្មតានៅពេលនេះ ប៉ុន្ដែការស៊ើបអង្កេតនៅក្នុងការវាយប្រហារនៅតែបន្ដធ្វើនៅឡើយ។

ការវាយប្រហារដ៏កម្រទៅលើទីភ្នាក់ងាប្រព័ន្ធផ្សព្វផ្សាយនេះ បានធ្វើឲ្យអ្នកសារព័ត៌មានក្នុងស្រុក ត្រូវតែបង្កើនការប្រុងប្រយ័ត្នជាបន្ទាន់ និងត្រៀមបង្កើនការពារខ្លួនដូចជាប្រើប្រាស់អាវក្រោះដើម្បីរក្សាសុវត្ថិភាពពួកគេនៅពេលដែលមានព្រឹត្ដការណ៍សំខាន់ៗ។

សមត្ថកិច្ច បាននិយាយថា មិនមានសេចក្ដីរាយការពីអ្នកស្លាប់ នៅក្នុងការវាយប្រហាទៅលើស្ទីយោរបស់ទូរទស្សន៍នោះទេ។

លោកម៉ាកូ វីនីស៊ីអូ ណាវ៉ាអេស(Marco Vinicio Narvaez) មេបញ្ជាការតំបន់៨ បាននិយាយថា នគរបាលជាតិ អេក្វាឌ័រ បានជួយសង្រ្គោះបុគ្គលិកទូរទស្សន៍ដោយជោគជ័យ។

ប្រទេសអេក្វាឌ័រថ្មីៗនេះ បានធ្លាក់ចូលក្នុងអំពើហិង្សា ដែលកើតឡើងពីស្ថានការណ៍មិនអាចគ្រប់គ្រងបាននៅពេលដែលកុបកម្មបានផ្ទុះឡើងនៅតាមពន្ធនាគារ និងការផ្ទុះគ្រាប់បែកបានកើតឡើងនៅក្នុងក្រុងមួយចំនួនដែលនាំអោយរថយន្ដជាច្រើនគ្រឿងត្រូវបានគេដុតបំផ្លាញ ហើយមន្រ្ដីនគបាលក៍ត្រូវបានគេចាប់ជាចំណាប់ខ្មាំងផងដែរ៕