ទីភ្នាក់ងារពន្ធនាគារ SNAI បាននិយាយកាលពីថ្ងៃចន្ទ (១៥ មករា) ថាអ្នកទោសចំនួន ៤៣នាក់ នៅ​តែមិនទាន់ចាប់ខ្លួនបានវិញ បន្ទាប់ពីបានរត់គេចពីពន្ធនាគារនៅភាគខាងជើងប្រទេសអេក្វាឌ័រ ខណៈ​ដែលកងកម្លាំងសន្តិសុខបន្តប្រតិបត្តិការនៅទូទាំងប្រទេស។ លោកប្រធានាធិបតី ដានីញ៉ែល ណូបូអា (Daniel Noboa) បានប្រកាសដាក់ប្រទេសក្នុងភាពអាសន្នរយៈពេល ៦០ថ្ងៃ កាលពីសប្តាហ៍មុន រួមទាំងបម្រាមគោចរពេលយប់ និងបានកំណត់ឧក្រិដ្ឋជនចំនួន ២២ក្រុម ជាក្រុមភេរវករ។

ការផ្ទុះអំពើហឹង្សានាពេលថ្មីៗនេះ រួមទាំងការ​វាយ​ប្រហារ​ដោយ​ខ្មាន់​កាំភ្លើង​ក្នុង​ស្ថានីយ៍​ទូរទស្សន៍​អំឡុង​ការ​ផ្សាយព័ត៌មាន ការបំផ្ទុះនៅក្នុងទីក្រុងជាច្រើន និងការចាប់ខ្លួនមន្ត្រីនគរបាល ហាក់ដូច​ជា​ការ​ឆ្លើយ​តបទៅនឹងផែនការរបស់លោកប្រធានាធិបតី ណូបូអា ដែលលោក​សន្យាថា​នឹង​ដោះស្រាយ​វិបត្តិ​សន្តិសុខដ៏ធ្ងន់ធ្ងររបស់ប្រទេសអេក្វាឌ័រ។

នគរបាល និងបុគ្គលិកយោធាជាច្រើនមានវត្តមាននៅក្នុងពន្ធនាគារនៅទូទាំងប្រទេសអេក្វាឌ័រ បន្ទាប់​ពីឆ្មាំ និងមន្ត្រីរដ្ឋបាលប្រមាណ ២០០នាក់ ដែលត្រូវបានចាប់ខ្លួន ត្រូវបាន​ដោះលែង​ពី​ពន្ធនាគារ​យ៉ាង​ហោចណាស់ចំនួនប្រាំពីរទីតាំងកាលពីចុងសប្តាហ៍។

ទីភ្នាក់​ងារពន្ធនាគារ SNAI បាននិយាយនៅក្នុងសេចក្តីថ្លែងការណ៍មួយកាលពីថ្ងៃចន្ទថា អ្នក​ទោស​ទាំង​នោះ​បានរត់គេចពីពន្ធនាគារមួយក្នុងទីក្រុង អេសមឺរ៉ាល់ដាស (Esmeraldas) ដែល​ជា​ទីក្រុង​ជិតព្រំដែនជាមួយប្រទេសកូឡុំប៊ី បន្ទាប់ពី​សមាជិក​នៃ​កង​កម្លាំង​សន្តិសុខ​អេក្វាឌ័រ​ប្រហែល ២០០០នាក់ បានធ្វើប្រតិបត្តិការស្វែងរកនៅក្នុងពន្ធនាគារនោះកាលពីថ្ងៃអាទិត្យ៕