ប្រព័ន្ធផ្សព្វផ្សាយ KCNA រាយការណ៍នៅថ្ងៃអង្គារនេះថា មេដឹកនាំកូរ៉េខាងជើង លោក Kim Jong Un កាលពីថ្ងៃចន្ទ ទី១៥ ខែមករា បានអំពាវនាវឱ្យមានវិសោធនកម្មរដ្ឋធម្មនុញ្ញ ដើម្បី​ផ្លាស់​ប្តូរ​ស្ថានភាព​របស់ប្រទេសកូរ៉េខាងត្បូងទៅជារដ្ឋដាច់ដោយឡែកមួយ ហើយបានព្រមានថា ខណៈ​ប្រទេស​របស់​លោកមិនស្វែងរកសង្រ្គាម ខ្លួនមិនមានចេតនាជៀសវាងឡើយ។ 

លោក Kim បាននិយាយថា នេះគឺជាការសន្និដ្ឋានចុងក្រោយរបស់លោក ដែលការ​បង្រួប​បង្រួម​ជាមួយ​កូរ៉េខាងត្បូង មិនអាចមានទៀតទេ នៅក្នុងសុន្ទរកថាទៅកាន់សភាប្រជាជនកំពូល ដែល​ជា​សភា​ប្រថាប់ត្រា របស់ប្រទេសកូរ៉េខាងជើង ស្របពេលចោទប្រកាន់ទីក្រុងសេអ៊ូល ពី​បទ​ស្វែង​រក​ការ​ផ្ដួលរំលំរបបកូរ៉េខាងជើង និងការបង្រួបបង្រួមដោយការជ្រៀតជ្រែក។ 

លោក Kim ត្រូវបានដកស្រង់សម្តីដោយទីភ្នាក់ងារសារព័ត៌មាន KCNA ថា យើង​មិន​ចង់​​បាន​សង្រ្គាម​ទេ ប៉ុន្តែយើង ក៏មិនមានចេតនាចង់ជៀសវាងដែរ ។

ប្រព័ន្ធ​ផ្សព្វផ្សាយរដ្ឋបាននិយាយថា អង្គការចំនួនបីដែលទាក់ទងនឹងការបង្រួបបង្រួម និង​ទេសចរណ៍​អន្តរកូរ៉េនឹងបិទ។

វិធានការ​នេះ​កើត​ឡើង​នៅ​ពេលភាព​តាន​តឹង​កើន​ឡើង​កាន់​តែ​ធ្ងន់​ធ្ងរ​នៅ​ក្នុង​ឧបទ្វីប​កូរ៉េ​នា​ពេល​ថ្មី​ៗ​នេះ ស្របពេលមានការសាកល្បងមីស៊ីលជាបន្តបន្ទាប់ និងការ​ជំរុញ​ដោយ​ទីក្រុង​ព្យុងយ៉ាង ដើម្បី​បំបែក​គោលនយោបាយជាច្រើនទសវត្សរ៍ និងការ​ផ្លាស់​ប្តូរ​របៀប​ដែល​ខ្លួន​ទាក់​ទង​នឹង​កូរ៉េ​ខាងត្បូង​។

យោងតាម KCNA ខណៈអំពាវនាវឱ្យ ចាត់ទុកកូរ៉េខាងត្បូងជា សត្រូវលេខមួយ នៅ​ក្នុង​រដ្ឋ​ធម្មនុញ្ញ​របស់​ខ្លួន លោក Kim ក៏បាននិយាយផងដែរថា សង្រ្គាមនឹងបំផ្លាញកូរ៉េខាងត្បូង និង​ដោះ​ស្រាយ​ការ​បរាជ័យ ដែលមិនអាចនឹកស្មានដល់ ចំពោះសហរដ្ឋអាមេរិក៕