មនី្ទរវប្បធម៌ និងវិចិត្រសិល្បៈ ខេត្តកណ្តាល ចូលរួមបណ្តុះបណ្តាលជំនាញមរតកដូនតា ក្នុង​វិស័យ​​វប្បធម៌​ដល់យុវជនជំនាន់ក្រោយ ស្របតាមគោលនយោបាយអាទិភាពរបស់រាជរដ្ឋាភិបាល អាណតិ្តទី៧។

លោកស្រី មួង សារឹម ប្រធានមនី្ទរវប្បធម៌ និងវិចិត្រសិល្បៈខេត្តកណ្តាល ថ្លែងប្រាប់BTV ព័ត៌មាន នា​ព្រឹក​ថ្ងៃទី១៦ ខែមករា ឆ្នាំ២០២៤នេះថា ក្នុងផែនការប្រចាំឆ្នាំ មន្ទីរវប្បធម៌ បាន​ធ្វើ​ការ​បណ្តុះ​បណ្តាល​តាម​ជំនាញ និងវគ្គនីមួយៗ។ ដោយឡែកកម្មវិធីបណ្តុះបណ្តាលជំនាញមករតកដូនតា មន្ត្រីជំនាញនឹង​ចាប់ផ្តើមអនុវត្តឆ្នាំ២០២៤ ហើយ​ក៏បានរៀបចំផែនការរួចរាល់ហើយ ក្នុង​នោះ​លោក​គ្រូ អ្នកគ្រ បង្គោលកំពុងបង្ហាត់ ចំណេះ ជំនាញ ដូនតានៅ​តាម​សហគមន៍​មូលដ្ឋាន​ខេត្ត​កណ្តាល ជូនដល់យុវជនជំនាន់ក្រោយ។

លោក វង្ស រ៉ាវ៉េត អនុប្រធានការិយាល័យទទួលបន្ទុករបាយការណ៍ស្រាវជ្រាវ និងចងក្រងឯកសារ បាន​លើកឡើងថា ផែនការឆ្នាំ២០២៤ សម្រាប់ការិយាល័យសិល្បៈសូនរូប និងសិល្បៈសិប្បកម្ម នៃ​មន្ទីរ​វប្បធម៌ និងវិចិត្រសិល្បៈ ខេត្តកណ្តាល មានសកម្មភាពសំខាន់ ៥ចំណុច ស្រង់​ស្ថិតិ​ធ្វើ​បច្ចុប្បន្ន​ជាមួយ​មន្ត្រីថ្នាក់ស្រុក និងបង្កើតមាតិកា សម្រាប់ផ្សព្វផ្សាយវិស័យវប្បធម៌ របស់​មនី្ទរ​វប្បធម៌ បណ្តុះបណ្តាលសិល្បៈសូនរូប ក្នុងទម្រង់យុទ្ធសាស្រ្តបញ្ចកោណរបស់រាជរដ្ឋាភិបាល បន្ត​ចង​ក្រង​ឯកសារ​ចម្លាក់ប្រាក់ស្ពាន់ និងត្រៀមចូលរួម​ព្រឹតិ្តការណ៍​មហោ​ស្រព​ថ្នាក់​ជាតិ​នា​ពេល​ខាង​មុខ​។ ផ្អែកលើចំណេះជំនាញដូនតានេះ គឺយើងព្យាយាមអភិរក្សស្នាដៃដូនតា និងចង់ឲ្យកូនខ្មែរ បាន​ស្គាល់ បើនិយាយមែនទែនទៅ ដូចជាតម្បាញសូត្រ ដោយ​ហេតុថា​របរ​នេះ​បន្ត​នៅ​សេស​សល់​តែ​បង​ប្អូន​ប្រជាពលរដ្ឋមានវ័យចំណាស់ ចាស់ៗ។ ដោយឡែកយុវជន វ័យក្មេង លែង​ធ្វើ​តម្បាញ​ហើយ ដោយសារពិបាកធ្វើ​។ ប៉ុន្តែបច្ចុប្បន្ននេះ ក្នុងយុទ្ធសាស្រ្តបញ្ចកោណដំណាក់កាលទី១ របស់​រាជ​រដ្ឋាភិបាលកម្ពុជា នីតិកាលទី៧ នៃរដ្ឋសភា បានទម្លាក់កិច្ចការងារនេះ ដើម្បី​ឲ្យ​មន្ត្រី​ចូល​រួម​ជួយ​។ ដូច្នេះមិនមែនមានតែតម្បាញសូត្រនោះទេ គឺចំនេះជំនាញដូនតា មានច្រើនណាស់ ដូច​ជា​ចម្លាក់​ប្រាក់ ស្ពាន់ ស្មិត ទម្រង់ចម្រៀងបុរាណ ល្ខោនបាសាក់។ ដោយឡែកការិយាល័យ គឺ​ផ្តោត​តែ​លើ​សិល្បៈសូនរូប និងសិល្បៈសិប្បកម្ម។

បើតាមលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បាន​ឲ្យ​ដឹង​ថា តាំងពីយូរលង់ណាស់មកហើយ ក្រៅពីប្រាសាទបុរាណ ដូនតាខ្មែរ បានបន្សល់​ទុក​នូវ​មរតក​ជា​ច្រើន សម្រាប់កូនចៅជំនាន់ក្រោយ។ ដូច្នេះការ​បណ្តុះ​បណ្តាល​ជំនាញ​មរតក​ពី​ដូនតា​នេះ​ ពិតជាសំខាន់ខ្លាំងណាស់។ នៅក្នុងឆ្នាំ២០២៤ រាជរដ្ឋាភិបាលកម្ពុជាអាណតិ្តទី៧ ក្រោម​ការ​ដឹក​នាំ​ដ៏ប៉ិនប្រសប់ប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី​ នៃ​ព្រះរាជាណាចក្រកម្ពុជា ផ្តោតលើក្រសួងវប្បធម៌ និងវិចិត្រសិល្បៈ ក្នុង​ការ​បណ្តុះ​បណ្តាល​ជំនាញវិជ្ជាជីវៈមរតកដូនតា បានដាក់ចេញ​នូវ​គោល​នយោបាយ​បណ្តុះ​បណ្តាល​ជំនាញ​វិជ្ជា​ជីវៈ​ចំនួន ១លាន៥សែននាក់ ក្នុងនោះពី ២ទៅ៤% ជាការបណ្តុះ​បណ្តាល​ជំនាញ​មរតក​ពី​ដូនតា ដូចជា៖ តម្បាញ ស្មូន ចម្លាក់ជាដើម។ ជំនាញដូនតាទាំងអស់នេះ បើមិន​មាន​ការ​បណ្តុះ​បណ្តាល​ទេ វានឹងបាត់ពីមួយជំនាន់ទៅមួយជំនាន់៕ អត្ថបទ៖ រដ្ឋា