ការខិតខំអភិវឌ្ឍន៍នូវអគារសិក្សាថ្មីៗបន្ថែម ពីសំណាក់រាជរដ្ឋាភិបាល និង​មាន​ការ​ចូលរួម​ពី​សប្បុរស​ជន នៅតាមសាកលវិទ្យាលរដ្ឋ បានធ្វើឲ្យមានសន្ទុះ នៃសិស្ស​និស្សិត​ទទួល​បាន​អាហារូបករណ៍​បន្តនៅថ្នាក់ឧត្តមសិក្សា ជាពិសេសនិស្សិតក្រីក្រ និងកាន់តែធ្វើឲ្យកម្ពុជា ទទួល​បាន​ធន​ធានមនុស្ស ដែលមានសក្ដានុពល ចូលរួមអភិវឌ្ឍន៍ប្រទេសជាតិ ។

ក្នុងពិធីបើកការប្រឡងតេស្តភាសាអង់គ្លេស សម្រាប់និស្សិតឆ្នាំទី១ ពុទ្ធិក​សាកល​វិទ្យាល័យ​ព្រះសីហមុនី​រាជា នៅថ្ងៃទី១៦ ខែមករា ឆ្នាំ២០២៤ ឯកឧត្តម ងួន ស្ដេចភក្តី រដ្ឋលេខាធិការ​ក្រសួង​ធម្មការ និងសាសនា និងជាសាកលវិទ្យាធិការរង នៃពុទ្ធិក​សាកល​វិទ្យាល័យ​ព្រះសីហមុនី​រាជា មានប្រសាសន៍ថា ការអភិវឌ្ឍធនធានមនុស្ស គឺជាវិស័យអាទិភាពមួយ ក្នុង​ចំណោម​យុទ្ធសាស្ត្រ​បញ្ច​កោណរបស់រាជរដ្ឋាភិបាល ហើយដោយមានការជ្រោមជ្រែង ពីសម្ដេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា និងសប្បុរសជននានា ទើបសាកលវិទ្យាល័យ បាន​កសាង​នូវ​អគារសិក្សាថ្មីកម្ពស់ ៩ជាន់ នឹងបានសម្ពោធដាក់ឲ្យប្រើប្រាស់កាលពីឆ្នាំមុន ។

ឯកឧត្តមបានបន្តថា កាលពីអគារថ្មី មិនទាន់សាងសងរួលរាល់ ក្នុង​មួយ​ឆ្នាំៗ​អាច​ទទួល​សមណ​និស្សិត និងសិស្សនិស្សិត ចូលសិក្សាបានប្រមាណ ៥០០ ទៅ៧០០នាក់ប៉ុណ្ណោះ ប៉ុន្តែ​នៅ​ឆ្នាំ​សិក្សា​ថ្មី​នេះ មានសមណនិស្សិត និងនិស្សិតក្រីក្របានទទួលអាហារូបករណ៍ ចូលរៀនកើន​ឡើង​ដល់​ជាង ១ពាន់នាក់ ។

និស្សិតទទួលអាហារូបករណ៍សិក្សា នៅពុទ្ធិកសាកលវិទ្យាល័យព្រះសីហមុនីរាជា បាន​លើក​ឡើង​ថា ពួកគេពិតជាពេញចិត្ត នឹងគោលនយោបាយអភិវឌ្ឍន៍ធនធានមនុស្សរបស់រាជរដ្ឋាភិបាល ដែល​ស្ដែង​ចេញតាមការពង្រីកសាលារៀន កសាងអគារសិក្សា និងការផ្ដល់​អាហារូបករណ៍​ដល់​និស្សិត​ក្រីក្រ ឬសិស្សពូកែបានសិក្សាតាមសាកលវិទ្យាលក្នុងប្រទេស និងបញ្ជូន​ទៅ​សិក្សា​នៅ​ក្រៅ​ប្រ​ទេស​ជាដើម ។

ក្នុងឱកាសយាងជាព្រះអធិបតី ពិធីបើកការប្រឡងនេះ សម្តេច​ព្រះ​អភិសិរី​សុគន្ធា​មហា​សង្ឃ​រាជា​ធិបតី​គតិ​ឧទេ្ទសបណ្ឌិត បួរ គ្រី ព្រះសាកលវិទ្យាធិការ នៃពុទ្ធិកសាកល​វិទ្យាល័យ​ព្រះសីហមុនី​រាជា​ មានព្រះបន្ទួលជំរុញដល់សមណនិស្សិត និងសិស្សនិស្សិតទាំងអស់ ត្រូវខិតខំរៀនសូត្រ ដើម្បី​យក​ចំណេះដឹង ដើម្បីអភិវឌ្ឍន៍ខ្លួនឲ្យមានចំណេះដឹងប្រចាំជីវិត ក៏ដូចជា​ចូល​រួម​ការ​កសាង​ប្រទេស​ជាតិ ឲ្យកាន់តែរីកចម្រើនបន្ថែមទៀត ៕ អត្ថបទ បាន សុខរិទ្ធិ