ភ្នំពេញ ៖ លោកស្រី ក្លែ កូណាន់ Claire Conan តំណាង និងជានាយិការប្រចាំប្រទេសនៃកម្មវិធីស្បៀងអាហារពិភពលោក (WFP) បានដឹកនាំគណៈប្រតិភូចូលជួបសម្តែងការគួរសម និងពិភាក្សាការងារជាមួយឯកឧត្តមបណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ត្រី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ និងជាប្រធានគណៈកម្មាធិការជាតិជំរុញចលនាភូមិ១ផលិតផល១ នៅទីស្តីការគណៈរដ្ឋមន្ត្រី នាព្រឹកថ្ងៃទី១៦ ខែមករា ឆ្នាំ២០២៤ ។

​ក្នុងជំនួបនោះលោកស្រី Claire Conan បានកោតសសើរពីវឌ្ឍនភាពរបស់កម្ពុជា ជាពិសេសលើវិស័យសន្តិសុខស្បៀង និងអាហារូបត្ថម្ភ ដែលសមិទ្ធផលនេះកើតចេញការដឹកនាំ និងសម្របសម្រួលរបស់ក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទដោយផ្ទាល់។ 

លោកស្រីបានលើកឡើងអំពីផែនការយុទ្ធសាស្រ្តសម្រាប់ប្រទេសកម្ពុជា ២០២៤-២០២៨ របស់អង្គការ WFP ដែលស៊ីគ្នាទៅនឹងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល និងដែលត្រូវយកមកសហការអនុវត្តជាមួយក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ ព្រមគាំទ្ររាជរដ្ឋាភិបាល ដើម្បីសម្រេចឲ្យបាននូវគោលដៅក្លាយជាប្រទេសមានចំនូលមធ្យមកម្រិតខ្ពស់នៅឆ្នាំ២០៣០។ 

លោកស្រីបញ្ជាក់ថា កង្វះអាហារូបត្ថម្ភ និងការធាត់លើសទម្ងន់ គឺសុទ្ធសឹងតែបង្កឲ្យមានភាពស្គាំងស្គម ស្លេកស្លាំង ក្រិសក្រិន និងបង្កជាជម្ងឺផ្សេងៗ ពិសេសមិនឆ្លងជាច្រើនប្រភេទ ធ្វើឲ្យខាតបង់សេដ្ឋកិច្ជជាតិយ៉ាងច្រើន។ 

ក្នុងឱកាសនោះឯកឧត្តមបណ្ឌិតសភាចារ្យ អ៊ុក រ៉ាប៊ុន បានថ្លែងអំណរគុណដល់អង្គការ WFP ដែលតែងតែគាំទ្រ និងសហការយ៉ាងល្អជាមួយក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ លើវិស័យសន្តិស្បៀង និងអាហារូបត្ថម្ភនៅកម្ពុជា និងគាំទ្រដល់ការលើកឡើងខាងលើរបស់លោកស្រី ក្លែ កូណាន់។ 

ឯកឧត្តមបណ្ឌិតសភាចារ្យទេសរដ្ឋមន្ត្រីបញ្ជាក់ថា តួនាទីរបស់អង្គការកម្មវិធីស្បៀងអាហារពិភពលោក ក្នុងរយៈពេលជាយូរកន្លងមកនេះបានរួមចំណែកដ៏សំខាន់ដល់សុខុមាលភាពរបស់ប្រជាជនកម្ពុជា ហើយក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ បានត្រៀមខ្លួនជាស្រេចក្នុងការបន្តការគាំទ្រ និងធ្វើកិច្ចសហប្រតិការជាមួយអង្គការ WFP ក្នុងការអនុវត្តយុទ្ឋសាស្ត្រជាតិលើកទី៣ (២០២៤-២០២៨)។

ជាចុងបញ្ចប់ ឯកឧត្តមបណ្ឌិតសភាចារ្យ បានស្នើសុំអង្គការស្បៀងអាហារពិភពលោកបន្តគាំទ្រដល់ដំណើរតាក់តែង អនុវត្ត និងវាយតម្លៃនៃយុទ្ធសាស្រ្តជាតិលើកទី៣ ស្តីពីសន្តិសុខស្បៀង និងអាហារូបត្ថម្ភ ដើម្បីរួមចំណែកសម្រេចឱ្យបានជោគជ័យនូវយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលអាណត្តិទី៧នៃរដ្ឋសភា៕ ដោយ ៖ ដារា