នាយករដ្ឋមន្ត្រីកាតា ព្រះអង្គម្ចាស់ Mohammed bin Abdulrahman Al Thani នៅថ្ងៃអង្គារ (ទី១៦ ខែមករា) នេះ បានមានព្រះបន្ទូលថា ការកើនឡើងនៃភាពតានតឹង នៅសមុទ្រក្រហម តំណាងឲ្យ«ការកើនឡើងគ្រោះថ្នាក់ធ្ងន់ធ្ងរបំផុត» នៅតំបន់មជ្ឈិមបូព៌ា ខណៈដែលជម្លោះនោះប៉ះពាល់ដល់ពាណិជ្ជកម្មពិភពលោក។

អំឡុងពេលផ្ដល់បទសម្ភាសន៍នៅឯវេទិកាសេដ្ឋកិច្ចពិភពលោក (WEF) នាទីក្រុង Davos ប្រទេសស្វីស នាយករដ្ឋមន្រ្តីកាតាអង្គនេះ ក៏បានព្រមានផងដែរថា ការនាំចេញឧស្ម័នធម្មជាតិរាវ (LNG) ទំនងជានឹងរងផលប៉ះពាល់ដោយសារភាពចលាចលដែលកំពុងកើនឡើង នៅក្នុងសមុទ្រក្រហម ដោយព្រះអង្គសង្កត់ធ្ងន់ថា ផ្លូវជំនួសផ្សេងដែលអាចប្រើសម្រាប់ការដឹកជញ្ជូន «មិនសូវល្អប្រសើរ» ដូចការដឹកជញ្ជូនឆ្លងកាត់សមុទ្រក្រហមនោះឡើយ។

ព្រះអង្គម្ចាស់នាយករដ្ឋមន្ត្រីបានមានព្រះបន្ទូលសង្កត់ធ្ងន់ថា «យើងមានការព្រួយបារម្ភយ៉ាងខ្លាំងអំពីការកើនឡើងនូវជម្លោះបន្ថែមទៀត» ដោយបន្ថែមថា ការឆ្លើយតបរបស់ទីក្រុងវ៉ាស៊ីនតោន និងទីក្រុងឡុងដ្រ៍ ចំពោះការវាយប្រហាររបស់ក្រុមហួទី នឹងបង្កើត «ហានិភ័យកាន់តែខ្ពស់» នៃការរីករាលដាលជម្លោះបន្ថែមទៀត។ ហើយព្រះអង្គម្ចាស់នាយករដ្ឋមន្ត្រីបានគូសបញ្ជាក់ថា បញ្ហាប៉ាឡេស្ទីន គឺជា «បញ្ហាស្នូល» សម្រាប់តំបន់ទាំងមូល៕