អ្នកនាំពាក្យមួយរូប នៅថ្ងៃអង្គារ(ទី១៦ ខែមករា) នេះ បាននិយាយថា ក្រុមហ៊ុន Nippon Yusen របស់ប្រទេសជប៉ុន ដែលជាក្រុមហ៊ុនដឹកជញ្ជូនដ៏ធំបំផុតរបស់ប្រទេសដោយផ្នែកលើការលក់ បានផ្អាកការធ្វើនាវាចរណ៍ឆ្លងកាត់សមុទ្រក្រហម សម្រាប់នាវាទាំងអស់ដែលក្រុមដំណើរការ។

អ្នកនាំពាក្យរូបនោះបាននិយាយថា ក្រុមហ៊ុនដែលត្រូវបានគេស្គាល់ថា «NYK Line» ក៏បានណែនាំដល់នាវារបស់ខ្លួនដែលធ្វើនាវាចរណ៍នៅជិតសមុទ្រក្រហមឲ្យរង់ចាំធ្វើដំណើរក្នុងផ្លូវទឹកសុវត្ថិភាព ហើយកំពុងពិចារណាពីការផ្លាស់ប្តូរផ្លូវ។

នេះគឺជាក្រុមហ៊ុនចុងក្រោយគេបង្អស់ដែលបញ្ឈប់ការឆ្លងកាត់តាមច្រករបៀងដឹកជញ្ជូនដ៏សំខាន់ បន្ទាប់ពីមានការផ្តល់ប្រឹក្សាពីកងកម្លាំងដែនសមុទ្ររួមបញ្ចូលគ្នា ដែលឲ្យចៀសពីតំបន់នេះ ក្រោយការចាប់ផ្តើមនៃការវាយប្រហារតាមអាកាសរបស់សហរដ្ឋអាមេរិក និងអង់គ្លេសទៅលើកងកម្លាំងហួទី នៅយេម៉ែន។

ជាមួយគ្នានេះ សារព័ត៌មាន Nikkei របស់ជប៉ុន នៅថ្ងៃអង្គារ (ទី១៦ ខែមករា) នេះ បានរាយការណ៍ថា ក្រុមហ៊ុនដឹកជញ្ជូនរបស់ជប៉ុន ២ផ្សេងទៀត គឺ Mitsui O.S.K. Lines និង Kawasaki Kisen Kaisha ក៏បានសម្រេចឲ្យនាវារបស់ខ្លួនទាំងអស់ផ្អាកការធ្វើនាវាចរណ៍ឆ្លងកាត់សមុទ្រក្រហមនេះដែរ៕