នាយករដ្ឋមន្ត្រីចិនលោក Li Qiang (លី ឈាង) នៅថ្ងៃអង្គារ (ទី១៦ ខែមករា) នេះ នៅទីក្រុង Davos ប្រទេសស្វីស បាននិយាយថា សេដ្ឋកិច្ចរបស់ប្រទេសចិនបើកចំហសម្រាប់អាជីវកម្ម និងបានបង្ហាញពីសក្តានុពលរបស់ប្រទេស សម្រាប់ការវិនិយោគបរទេស ខណៈដែលចំនួនប្រជាជនដ៏ច្រើនរបស់ប្រទេស ក្លាយជាទៅជាទីប្រជុំជនកាន់តែច្រើនឡើងយ៉ាងឆាប់រហ័ស ហើយវណ្ណៈកណ្តាលរបស់ប្រទេសត្រូវបានព្យាករថា នឹងកើនឡើង។

នៅពេលដែលប្រទេសចិនត្រូវប្រឈមនឹងការស្ទុះងើបឡើងវិញនៃសេដ្ឋកិច្ចក្រោយជំងឺរាតត្បាត ក្នុងល្បឿនដ៏យឺត និងការធ្លាក់ចុះនៃអចលនទ្រព្យ នាយកប្រតិបត្តិនៅក្រៅប្រទេសបានមានការព្រួយបារម្ភកាន់ខ្លាំងឡើងអំពីទស្សនវិស័យកំណើនរយៈពេលវែងរបស់ប្រទេសជាលើកដំបូងក្នុងរយៈពេល ៤ទសវត្សរ៍ គិតចាប់តាំងពីទីក្រុងប៉េកាំងបានបើកប្រទេសសម្រាប់ការវិនិយោគបរទេស។

នៅក្នុងសុន្ទរកថាកិច្ចប្រជុំទៅកាន់បណ្ដាអ្នកដឹកនាំធុរកិច្ច នៅឯវេទិកាសេដ្ឋកិច្ចពិភពលោក (WEF) នៅទីក្រុង Davos លោក លី បានលើកឡើងថា សេដ្ឋកិច្ចចិនបានស្ទុះងើបឡើងវិញ និងកើនឡើង ហើយត្រូវបានគេប៉ាន់ប្រមាណថា នឹងកើនឡើងប្រហែល ៥,២ភាគរយ នៅឆ្នាំ២០២៣ ដែលលើសពីគោលដៅផ្លូវការប្រហែល ៥ភាគរយ។

លោកបាននិយាយថា សេដ្ឋកិច្ចរបស់ប្រទេសចិនកំពុងមានការរីកចម្រើនជាលំដាប់ អាចដោះស្រាយចំពោះការឡើង និងការធ្លាក់ចុះនៅក្នុងដំណើរការរបស់ខ្លួន ហើយនឹងបន្តផ្តល់នូវកម្លាំងរុញច្រានជាសកល ដោយបបន្ថែមថា និន្នាការជារួមនៃកំណើនរយៈពេលវែង នឹងមិនផ្លាស់ប្តូរនោះទេ។

សូមបញ្ជាក់ថា លោក លី ដែលដឹកនាំគណៈប្រតិភូរដ្ឋាភិបាលដ៏ធំ នៅ WEF សប្តាហ៍នេះ គឺជាមន្ត្រីជាន់ខ្ពស់បំផុតរបស់ចិនដែលបានចាប់ដៃជាមួយក្រុមធុរកិច្ចពិភពលោក និងឥស្សរជននយោបាយ នៅទីក្រុងរមណីយដ្ឋានជិះស្គីរបស់ប្រទេសស្វីស គិតចាប់តាំងពីប្រធានាធិបតី លោក Xi Jinping (ស៊ី ជីនពីង) បានធ្វើបែបហ្នឹងក្នុងឆ្នាំ២០១៧៕