នាយករដ្ឋមន្ត្រីហ៊្សកដានី លោក ប៊ីស្ហឺ អាល់ ខាសាវ៉ាណេស (Bisher al Khasawaneh) បាននិយាយកាលពីថ្ងៃអង្គារ (១៦ មករា) ថាសន្តិភាពជាមួយអ៊ីស្រាអែល នៅតែជាជម្រើសយុទ្ធសាស្ត្រ ប៉ុន្តែការជំរុញណាមួយដើម្បីរុញច្រានជនជាតិប៉ាឡេស្ទីនចូលទៅព្រះរាជាណាចក្រនេះនឹងបង្កការគំរាមកំហែង «ដល់ការតាំងនៅនៃរដ្ឋ»។

ហ្ស៊កដានី ដែលមានព្រំប្រទល់ជាប់នឹងតំបន់វេស បែង (West Bank) បារម្ភថាជម្លោះហ្កាហ្សា អាចរីករាលដាលជាមួយនឹងអំពើហិង្សាកាន់តែទូលំទូលាយដោយអ្នកតាំងលំនៅប្រដាប់អាវុធដែលត្រូវបានលើកទឹកចិត្តដោយកងទ័ព ដែលបង្កឱ្យមានការភៀសខ្លួនរបស់ជនជាតិប៉ាឡេស្ទីនទ្រង់ទ្រាយធំទៅកាន់ផ្នែកម្ខាងទៀតនៃទន្លេហ្ស៊កដានី។

លោក ខាសាវ៉ាណេស បាននិយាយដោយសំដៅលើកិច្ចព្រមព្រៀងឆ្នាំ១៩៩៤ របស់ប្រទេសនេះជាមួយអ៊ីស្រាអែលក្នុងអំឡុងពេលសម័យប្រជុំនៅទីក្រុង ដេវ៉ូស ថា «ក្នុងករណីដែលមានសកម្មភាព និងលក្ខខណ្ឌដែលបង្កើត និងធ្វើឲ្យមានការផ្លាស់ទីលំនៅដ៏ធំនៃចំនួនប្រជាជនប៉ាឡេស្ទីន នោះគឺជាការរំលោភយ៉ាងច្បាស់លាស់លើសន្ធិសញ្ញាសន្តិភាព»។

នាយករដ្ឋមន្ត្រីហ៊្សកដានីរូបនេះបានបន្ថែមថា ដំណោះស្រាយតែមួយគត់ដើម្បីជៀសវាងជម្លោះកាន់តែស៊ីជម្រៅ និងអស្ថិរភាពក្នុងតំបន់ គឺត្រូវដាក់ដំណើរការនយោបាយជាមួយនឹងក្រមខណ្ឌពេលវេលាដែលនាំទៅរកដំណោះស្រាយរដ្ឋពីរ ដែលរដ្ឋប៉ាឡេស្ទីននឹងលេចចេញជារូបរាងជាមួយអ៊ីស្រាអែល៕