បាល់ទាត់៖ ក្រម​បាល់ទាត់​ជម្រើស​ជាតិ​កម្ពុជា​នឹង​ត្រូវ​ប្រកួត Playoff រក​កៅអី​វគ្គ​ជម្រុះ​ជុំ​ទី​៣ ការ​ប្រកួត​ពាន​រង្វាន់​តំបន់​អាស៊ី​ឆ្នាំ​២០២៣ (AFC Asian Cup) នៅ​ប្រទេស​ចិន ជាមួយ​កោះ​មហាសមុទ្រ​ប៉ាស៊ីហ្វិក​ខាងលិច​ហ្គាំ​ (Guam) កំឡុង​ខែ​កញ្ញា និង​ខែ​តុលា​ខាង​មុន​នេះ​។​

​អតីត​គ្រូ​បង្វឹក​ជម្រើស​ជាតិ​កម្ពុ​ជា លោក ​ប្រាក់ សុវណ្ណារ៉ា បាន​ប្រាប់​ឱ្យ​ដឹង​ថា បើ​និយាយ​ពី​ការ​អភិវឌ្ឍ​បាល់ទាត់​ហ្គាំ ​(Guam) នៅ​ឆ្ងាយ​ពី​កម្ពុជា ប៉ុន្តែ​អ្វី​ដែល​ចាប់​អារម្មណ៍​កីឡាករ​សុទ្ធតែ​ចម្រុះ​ជាតិ​សាសន៍ ហើយ​លេង​សុទ្ធ​តែ​ជា​មួយ​ក្រុម​ខ្លាំង​ៗ​។ លោក​បន្ត​ថា បើ​មកលេង​នៅ​ទឹកដី​កម្ពុជាពិបាក​ឈ្នះ​ជម្រើស​ជាតិ​កម្ពុជា​ណាស់ ម្យ៉ាង​អោយ​តែ​ដំណើរកា​រលីគ​បាន​គឺ​មាន​លទ្ធភាព​ឈ្នះ​។​ ចំនែក​លោក Conor Nestor គ្រូ​បង្វឹក​ក្រុម​ព្រះខ័ន​រាជ​ស្វាយរៀង​ក៏បាន​បញ្ចេញ​ទស្សនៈ​ជុំវិញ​នេះដែរ​ថា ​ប៉ុន្មាន​ឆ្នាំ​ចុង​ក្រោយនេះក្រុមបាល់ទាត់​ជម្រើស​កោះ​ហ្គាំ (Guam) មានការ​រីកចម្រើន​ច្រើន ហើយ​សង្ឃឹមថា​ ការប្រកួត​ជាមួយ​ក្រុម​ខ្លាំង​ៗ​កន្លងទៅ​ថ្មីៗ​នេះ​ នឹង​ជួយ​ឱ្យ​ជម្រើស​ជាតិ​កម្ពុជា​ទទួល​បាន​លទ្ធផល​ល្អ​។​ ​ដោយឡែក​លោក ហុក សុ​ជីវន្ត អតីត​កីឡាករ​ជម្រើស​ជាតិ​កម្ពុជាលើកឡើង​ដែរ​ថា ដោយ​បាន​មើល​ការប្រកួត​របស់​ហ្គាំ (Guam)​ ជម្រុះ​បាល់ទាត់​ពិភពលោក ឃើញ​ថា​មាន​កីឡាករ​ថ្មីៗ​ច្រើន ក្រុម​ទាំងពីរ​ស្ទើរតែ​ប្រហាក់​ប្រហែល​គ្នា តែ​ជម្រើស​ជាតិ​កម្ពុជា​មានប្រៀប​បន្តិច យ៉ាង​ណា​ការប្រកួត​នេះ​នឹង​ល្អមើល​។​

​នេះ​ជា​លើក​ទី​៣ ​ដែល​កម្ពុជា និង​ហ្គាំ​ជួប​គ្នា​ ដោយ ២​លើក​កន្លងមក​នៅ​ឆ្នាំ​២០០៦ ​កម្ពុជាឈ្នះ​ហ្គាំ ៣​ទល់នឹង​០ ការប្រកួត ​AFC Challenge Cup តែ​ឆ្នាំ​២០១៣ ហ្គាំ​ឈ្នះ​កម្ពុជា ២​ទល់នឹង​០​វិញប្រកួត​មិត្តភាព​អន្តរជាតិ​។​ តាម​ការ​គ្រោង​ទុក​ថ្ងៃ​ទី​៧ ខែ​កញ្ញា ឆ្នាំ​២០២១ ហ្គាំ​ប្រកួត​ជាមួយ​កម្ពុជា ខណៈ​ជើង​ទី​២ ​លេង​នៅ​ថ្ងៃ​ទី​១២ ខែ​តុលា ​ឆ្នាំ​២០២១ កម្ពុជា​ប្រកួត​ជាមួយ​ហ្គាំ​។ ចំពោះ​ទីកន្លែង​ប្រកួតដោយសារ​ជំងឺ​រាតត្បាត​សកល​កូ​វីដ​-១៩ មិនទាន់​ត្រូវ​កំណត់​ថា​ តើ​លេង​នៅ​ទឹកដី​ក្រុម​ទាំងពីរ រឺ​ទឹក​កណ្ដាល​នៅឡើយ​៕

អត្ថបទ៖ គង់ ហួន