នៅត្រីមាសទី១ ឆ្នាំ២០២៤ ខាងមុខនេះ អាជ្ញាធរអគ្គិសនីកម្ពុជា នឹង​ប្រកាស​ដាក់​ឲ្យ​ប្រើ​ប្រាស់​ជា​ផ្លូវ​ការ នូវបទប្បញ្ញត្តិថ្មី ការដំឡើង និងប្រើប្រាស់ប្រព័ន្ធថាមពលពន្លឺព្រះអាទិត្យលើដំបូល ខណៈ​ក្រសួង-ស្ថាប័ន និងដៃគូពាក់ព័ន្ធ បានកំពុងជួបប្រជុំគ្នា ដើម្បីពិភាក្សា និងប្រមូលធាតុចូល ដើម្បី​ឆ្លើយ​តប​តាម​កំណើនតម្រូវការថាមពល។

ឯកឧត្តម យឹម វិសិដ្ឋ ប្រធានអាជ្ញាធរអគ្គិសនីកម្ពុជា បាន​មាន​ប្រសាសន៍​ប្រាប់​ក្រុម​អ្នក​សារ​ព័ត៌មាន ក្រោយសិក្ខាសាលាពិគ្រោះយោបល់លើសេចក្តីព្រាង បទប្បញ្ញត្តិស្តីពីការដំឡើង និង​ប្រើ​ប្រាស់​ប្រព័ន្ធ​ថាមពលពន្លឺព្រះអាទិត្យលើដំបូលកម្ពុជា នៅព្រឹកថ្ងៃទី១៧ ខែមករានេះថា ការ​ប្រើ​ប្រាស់​ថា​មពលពន្លឺព្រះអាទិត្យត្រូវបានលើកទឹកចិត្តនៅក្នុងគោលនយោបាយរបស់រាជរដ្ឋាភិបាល ដូច​នេះ​ហើយ នៅឆ្នាំ២០២១៨ អាជ្ញាធរអគ្គិសនីកម្ពុជាបានចេញបទប្បញ្ញត្តិ ដែលមានឈ្មោះថា លក្ខ​ខណ្ឌ​ទូទៅក្នុ​ង​ការ​ភ្ចាប់​ប្រភព​អគ្គិសនី​ពី​ប្រព័ន្ធ​ថាមពល​ពន្លឺ​ព្រះអាទិត្យ​ទៅ​ជាមួយ​ប្រព័ន្ធ​អគ្គិសនី ឬជាមួយប្រព័ន្ធ​ប្រើប្រាស់​អគ្គិសនី​ដែល​ឋិតនៅ​ក្នុង​ប្រព័ន្ធ​ផ្គត់ផ្គង់​អគ្គិសនី​របស់​បណ្តាញ​ជាតិ ដែលបានអនុញ្ញាតឲ្យអ្នកប្រើប្រាស់អគ្គិសនីធុនធំ-អ្នកប្រើប្រាស់តង់ស្យុងមធ្យម និងអ្នក​ប្រើប្រាស់​អគ្គិសនីធុនដុំ-អ្នកប្រើប្រាស់តង់ស្យុងខ្ពស់ អាចដំឡើង និង​ប្រើប្រា​ស់​ប្រប័ន្ធ​ពន្លឺ​ព្រះអាទិត្យ​នៅ​កម្ពុជា ហើយភ្ជាប់ជាមយយប្រព័ន្ធបណ្តាញជាតិ។

សូមជម្រាបជូនថា សេចក្តីព្រាងបទប្បញ្ញត្តិស្តីពីការដំឡើង និងប្រើប្រាស់​ប្រព័ន្ធ​ថាមពល​ពន្លឺ​ព្រះអាទិត្យ​លើ​ដំបូលកម្ពុជា ដែលបានរៀបចំរួចរាល់ នឹងត្រូវធ្វើការពិនិត្យ ពិភាក្សា និង​ប្រមូល​ធាតុ​ចូល​នេះ មានកំណត់អំពីគោការណ៍ និងលក្ខខណ្ឌសំខាន់ៗដូចជា៖ គោលការណ៍​សម្រាប់​ការ​អនុញ្ញាត​ឲ្យ​ប្រើប្រាស់ថាមពលពន្លឺព្រះអាទិត្យលើដំបូលនៅកម្ពុជា , ការផ្សព្វផ្សាយអំពី​កូតា​សម្រាប់​ការ​ដំឡើងប្រព័ន្ធថាមពលពន្លឺព្រះអាទិត្យលើកដំបូលប្រចាំឆ្នាំ , នីតិវិធីសម្រាប់​ការ​ផ្លាស់​ប្តូរ​ទំហំ​នៃប្រព័ន្ធថាមពលពន្លឺព្រះអាទិត្យមានស្រាប់ និង​ការ​គណនា​ថ្លៃ​អគ្គិសនី​សម្រាប់​អ្នក​ប្រើប្រាស់​ដែល​ដំឡើងប្រព័ន្ធថាមពលពន្លឺព្រះអាទិត្យភ្ជាប់ជាមួយប្រព័ន្ធបណ្តាញជាតិ៕ អត្ថបទ៖ ឈិត បូរ៉ាវី