ចំនួននៃការអនុញ្ញាតការសិក្សារបស់កាណាដា ដែលចេញដល់និស្សិតឥណ្ឌា បានធ្លាក់ចុះយ៉ាងខ្លាំងកាលពីចុងឆ្នាំមុន បន្ទាប់ពីឥណ្ឌាបានបណ្តេញអ្នកការទូតកាណាដា ដែលដំណើរការលើការអនុញ្ញាតនេះ ហើយមាននិស្សិតឥណ្ឌាតិចជាងមុនដែលបានដាក់ពាក្យ ដោយសារតែជម្លោះការទូតជុំវិញការសម្លាប់មេដឹកនាំផ្តាច់ខ្លួនសាសនាស៊ីក នៅក្នុងប្រទេសកាណាដា នេះបើយោងតាមមន្ត្រីជាន់ខ្ពស់របស់កាណាដា ម្នាក់បានប្រាប់សារព័ត៌មានរ៉យទ័រ។

រដ្ឋមន្ត្រីអន្តោប្រវេសន៍លោក ម៉ាក មីលឡឺ (Marc Miller) បានបន្ថែមនៅក្នុងបទសម្ភាសន៍មួយថា លោកជឿថាចំនួននៃការអនុញ្ញាតការសិក្សាដល់ប្រជាជនឥណ្ឌា ទំនងជាមិនងើបឡើងវិញក្នុងពេលឆាប់ៗនេះទេ។ ភាពតានតឹងការទូតបានផ្ទុះឡើងបន្ទាប់ពីនាយករដ្ឋមន្រ្តីកាណាដា លោក ចាស្ទីន ទ្រូដូ (Justin Trudeau) កាលពីខែមិថុនា បាននិយាយថាមានភស្តុតាងដែលភ្ជាប់ភ្នាក់ងាររដ្ឋាភិបាលឥណ្ឌាទៅនឹងការសម្លាប់លោក ហាឌីប ស៊ីញនីចា (Hardeep Singh Nijjar) នៅខេត្ត ប្រ៊ីធធីស កូឡំប៊ី (British Columbia)។

លោក មីលឡឺ បាននិយាយថាភាពតានតឹងទំនងជាដាក់បន្ទុកលើតួលេខនិស្សិតបន្តទៀត។ ប្រជាជនឥណ្ឌាបានបង្កើតក្រុមនិស្សិតអន្តរជាតិដ៏ធំបំផុតនៅក្នុងប្រទេសកាណាដា ក្នុងប៉ុន្មានឆ្នាំថ្មីៗនេះ ដែលមានច្រើនជាង ៤១ភាគរយ ឬប្រហែលនឹង ២២៥.៨៣៥នាក់ នៃការអនុញ្ញាតទាំងអស់ដែលឲ្យទៅពួកគេនៅឆ្នាំ២០២២។

និស្សិតអន្តរជាតិគឺជាចំណូលសាច់ប្រាក់ដ៏សំខាន់សម្រាប់បណ្ដាសាកលវិទ្យាល័យកាណាដា ខណៈដែលពួកគេរកចំណូលបានប្រហែល ២២ពាន់លានដុល្លារកាណាដា ពោលគឺប្រហែល ១៦,៤ពាន់លានដុល្លារអាមេរិក ជារៀងរាល់ឆ្នាំ ហើយការធ្លាក់ចុះនៃតួលេខនិសិ្សតនេះនឹងបង្កជាបញ្ហាដល់ស្ថាប័នអប់រំទាំងនោះ៕