រដ្ឋាភិបាលចិន បាននិយាយនៅថ្ងៃពុធ (ទី១៧ ខែមករា) នេះថា ជំហររបស់ចិនដែលថា ខ្លួននឹងមិនបោះបង់ចោលការប្រើប្រាស់កម្លាំង ដើម្បីនាំយកកោះតៃវ៉ាន់ឲ្យមកស្ថិតនៅក្រោមការគ្រប់គ្រងរបស់ខ្លួននោះ គឺសំដៅលើការជ្រៀតជ្រែកពីបរទេស និងក្រុមអ្នកបំបែកខ្លួនមួយចំនួនតូចប៉ុណ្ណោះ ដោយបន្ថែមថា ខ្លួនមានឆន្ទៈ «ក្នុងការបង្រួបបង្រួមដោយសន្តិភាព»។

រដ្ឋបាលជាប់ឆ្នោតតាមបែបប្រជាធិបតេយ្យរបស់កោះតៃវ៉ាន់ បានច្រានចោលការទាមទារអធិបតេយ្យភាពរបស់ទីក្រុងប៉េកាំង ប៉ុន្តែបានផ្តល់ការចរចាម្តងហើយម្តងទៀតដែលតែងត្រូវបានបដិសេធ។ ហើយប្រជាជនរបស់កោះនេះ កាលពីថ្ងៃសៅរ៍ចុងសប្ដាហ៍កន្លងមក បានបោះឆ្នោតជ្រើសរើសលោក Lai Ching-te របស់គណបក្សដែលកំពុងកាន់អំណាច គឺប្រជាធិបតេយ្យជឿនលឿន (DPP) ដែលចិនចាត់ទុកជាអ្នកបំបែកខ្លួនដ៏គ្រោះថ្នាក់នោះ ជាមេដឹកនាំបន្ទាប់ ទោះបីជាមានសំឡេងតិចជាងពាក់កណ្តាលក៏ដោយ។ គណបក្ស DPP ក៏បាត់បង់សំឡេងភាគច្រើនដាច់ខាតក្នុងសភា នៅក្នុងការបោះឆ្នោតនេះផងដែរ។

អ្នកនាំពាក្យការិយាល័យកិច្ចការកោះតៃវ៉ាន់របស់ប្រទេសចិន លោក Chen Binhua បានប្រាប់សន្និសីទសារព័ត៌មាន ដែលតែងធ្វើជាប្រចាំនៅទីក្រុងប៉េកាំងថា លទ្ធផលនៃការបោះឆ្នោតរបស់កោះតៃវ៉ាន់ មិនបានផ្លាស់ប្តូរការពិត ដែលថា កោះនេះជារបស់ចិននោះឡើយ ហើយនៅទីបំផុតនឹងត្រូវបាន «បង្រួបបង្រួម»។

លោក Chen បាននិយាយថា៖ «ការមិនសន្យារបស់យើង ក្នុងការបោះបង់ចោលនូវការប្រើប្រាស់កម្លាំងនោះ គឺពិតជាមិនបានផ្តោតលើជនរួមជាតិតៃវ៉ាន់នោះឡើយ។ យើងកំពុងកំណត់គោលដៅលើការជ្រៀតជ្រែកពីកងកម្លាំងខាងក្រៅ និងចំនួនតិចតួចនៃក្រុមបំបែកខ្លួនឯករាជ្យរបស់កោះតៃវ៉ាន់ និងសកម្មភាពបំបែកខ្លួនរបស់ពួកគេ»៕