រដ្ឋមន្ត្រីក្រសួងមហាផ្ទៃរបស់ប្រទេសអ៊ីតាលី ស្លូវេនី និងក្រូអាត បានជួបប្រជុំគ្នា នៅជិតព្រំដែនក្រូអាត-ស្លូវេនី កាលពីថ្ងៃអង្គារ (ទី១៦ ខែមករា) ដើម្បីពិភាក្សាអំពីការត្រួតពិនិត្យព្រំដែន និងកិច្ចសហប្រតិបត្តិការនគរបាលព្រំដែន ទាក់ទងនឹងអន្តោប្រវេសន៍ដែលគ្មានការអនុញ្ញាត។

រដ្ឋមន្ត្រីបានជួបប្រជុំគ្នានៅទីក្រុង Buzet ដែលមានរយៈពេល ៣ខែបន្ទាប់ពីអ៊ីតាលីបានស្ដារការត្រួតពិនិត្យនគរបាលឡើងវិញ នៅតាមព្រំដែនភាគឦសានរបស់ខ្លួន ដោយផ្អាកការចរាចរដោយសេរី ដែលត្រូវបានអនុញ្ញាតជាធម្មតា នៅក្នុងប្រទេសសហភាពអឺរ៉ុបភាគច្រើន ក្រោមសន្ធិសញ្ញា Schengen។ ស្លូវេនីក៏បានធ្វើដូចគ្នាដែរនៅតាមព្រំដែនជាមួយក្រូអាត និងហុងគ្រី ក្នុងខែតុលា ឆ្នាំ២០២៣។

អន្តោប្រវេសន៍គឺជាបញ្ហាដ៏ក្តៅគគុក នៅអឺរ៉ុប ចាប់តាំងពីឆ្នាំ២០១៥ មក នៅពេលដែលមនុស្សជាង ១លាននាក់ បានធ្វើដំណើរទៅដល់សមុទ្រមេឌីទែរ៉ាណេ ដែលភាគច្រើនតាមរយៈទូករបស់អ្នករត់ពន្ធ ដែលជំរុញឲ្យសហភាពអឺរ៉ុប រឹតបន្តឹងព្រំដែន និងច្បាប់សុំសិទ្ធិជ្រកកោនរបស់ខ្លួន។

ផ្លូវធ្វើដំណើររបស់បណ្ដាប្រទេសបាល់កង់ខាងលិចកាត់តាមទួរគី ប៊ុលហ្គារី ម៉ាសេដូនី និងស៊ែប៊ី គឺជាផ្លូវទេសន្តរប្រវេសន៍មួយផ្សេងទៀត ដើម្បីចូលទៅក្នុងសហភាពអឺរ៉ុប៕

នគរបាលព្រំដែន Frontex របស់សហភាពអឺរ៉ុប បាននិយាយកាលពីថ្ងៃអង្គារថា មានការឆ្លងកាត់ព្រំដែនមិនទៀងទាត់ប្រមាណជា ៣៨០.០០០នាក់ នៅទូទាំងប្លុក ក្នុងឆ្នាំ២០២៣ ដែលជាកម្រិតខ្ពស់បំផុតចាប់តាំងពីឆ្នាំ២០១៦។ ហើយយោងតាម Frontex បានឲ្យដឹងថា តួលេខនេះបង្ហាញពីការកើនឡើង ១៧ភាគរយ ធៀបនឹងឆ្នាំ២០២២៕