ប្រទេសកាណាដា កាលពីថ្ងៃទី១៦ ខែមករា បានបង្ក្រាបអ្នកស្រាវជ្រាវ ដែលមានទំនាក់ទំនងជាមួយបញ្ជីសាកលវិទ្យាល័យសំខាន់ៗ ដែលមានមូលដ្ឋាននៅប្រទេសចិន ដើម្បីបញ្ឈប់ពួកគេធ្វើការលើមុខវិជ្ជាដែលចាត់ទុកថា មានលក្ខណៈរសើបឬរិះគន់ចំពោះសន្តិសុខជាតិកាណាដា។

នៅក្នុងវិធានការដែលទីក្រុង Ottawa បាននិយាយថា មានគោលបំណងការពារបច្ចេកវិទ្យាជឿនលឿន និងកំពុងរីកចម្រើននោះ ជំនួយរបស់រដ្ឋាភិបាលនឹងមិនត្រូវបានផ្តល់ឲ្យអ្នកស្រាវជ្រាវដែលមានបណ្ដាញជាមួយបណ្ដាសាកលវិទ្យាល័យ ដែលជាប់ពាក់ព័ន្ធនឹងអង្គភាពការពារជាតិ និងសន្តិសុខនៃប្រទេស ដែលអាចប៉ះពាល់ដល់សន្តិសុខ។ សាកលវិទ្យាល័យភាគច្រើនមានមូលដ្ឋាននៅក្នុងប្រទេសចិន ប៉ុន្តែមួយចំនួនមកពីប្រទេសអ៊ីរ៉ង់ និងរុស្ស៊ីក៏ត្រូវបានចុះបញ្ជីផងដែរ។

រដ្ឋមន្ត្រីក្រសួងនវានុវត្តន៍ សុខភាព និងសុវត្ថិភាពសាធារណៈ បាននិយាយនៅក្នុងសេចក្តីថ្លែងការណ៍រួមមួយថា៖ «ខណៈពេលដែលការស្រាវជ្រាវដែលដឹកនាំដោយប្រទេសកាណាដា ត្រូវបានកំណត់ដោយភាពល្អឥតខ្ចោះ និងការសហការគ្នា ការបើកចំហររបស់ខ្លួន អាចធ្វើឲ្យវាក្លាយជាគោលដៅសម្រាប់ឥទ្ធិពលបរទេស»។

មន្ត្រីម្នាក់ បាននិយាយថា ខណៈពេលដែលគោលនយោបាយប៉ះពាល់ដល់ការផ្តល់មូលនិធិសហព័ន្ធតែប៉ុណ្ណោះ រដ្ឋាភិបាលទីក្រុង Ottawa សង្ឃឹមថា វានឹងប្រើប្រាស់ជាការណែនាំដោយរដ្ឋាភិបាលខេត្ត និងស្ថាប័ននានារបស់កាណាដា។

កាលពីឆ្នាំ២០២២ ប្រទេសកាណាដា បានចាប់ខ្លួន និងចោទប្រកាន់អ្នកស្រាវជ្រាវម្នាក់ពីបទចារកម្មថា បានព្យាយាមលួចអាថ៌កំបាំងពាណិជ្ជកម្ម ដើម្បីផ្តល់ផលប្រយោជន៍ដល់ប្រទេសចិន៕