សម្តេច ប៉ាប ហ្វ្រង់ស៊ីស ( Pope Francis) នៅថ្ងៃពុធនេះ បានថ្កោលទោសការវាយប្រហារដោយមីស៊ីលរបស់អ៊ីរ៉ង់ទៅលើតំបន់ឃើដឌីនស្តង់ (Kurdistan) នៅប្រទេសអ៊ីរ៉ាក់ភាគខាងជើង ហើយបានជំរុញឲ្យ ភាគីទាំងអស់ជៀសវាងការធ្វើឲ្យជម្លោះនៅមជ្ឈិមបូព៌ាកើនឡើង។

ការវាយប្រហារនេះ បានធ្វើឲ្យមានការព្រួយបារម្ភកាន់តែខ្លាំងអំពីអស្ថិរភាពកាន់តែអាក្រក់ នៅទូទាំងមជ្ឈិមបូព៌ា ចាប់តាំងពីសង្រ្គាមរវាងអ៊ីស្រាអែល និងក្រុមហាម៉ាស បានផ្ទុះឡើងកាលពីថ្ងៃទី៧ ខែតុលា ដោយសម្ព័ន្ធមិត្តរបស់អ៊ីរ៉ង់ ក៏បានចូលជ្រៀតជ្រែកពីប្រទេសលីបង់ ស៊ីរី អ៊ីរ៉ាក់ និងយេម៉ែនផងដែរ។

សម្តេចប៉ាប បានមានព្រះបន្ទូល ក្នុងអំឡុងពេលជំនួបប្រចាំសប្តាហ៍របស់ព្រះអង្គ នៅឯបុរីវ៉ាទីកង់ថា៖«ខ្ញុំបង្ហាញពីភាពស្និទ្ធស្នាល និងសាមគ្គីភាពរបស់ខ្ញុំជាមួយជនរងគ្រោះ ជនស៊ីវិលទាំងអស់នៃការវាយប្រហារដោយមីស៊ីលដែលបានវាយប្រហារតំបន់ទីក្រុង Erbil ដែលជារដ្ឋធានីនៃតំបន់ស្វយ័តឃើដឌីស្តង់នៃប្រទេសអ៊ីរ៉ាក់»។

ព្រះអង្គ បានមានព្រះបន្ទូលទៀតថា៖«ទំនាក់ទំនងល្អរវាងប្រទេសជិតខាង មិនត្រូវបានកសាងឡើងដោយសកម្មភាពស្រដៀងគ្នានេះទេ ប៉ុន្តែជាមួយនឹងការសន្ទនា និងកិច្ចសហការ។ ខ្ញុំស្នើឲ្យអ្នកគ្រប់គ្នាជៀសវាងនូវជំហានណាមួយដែលជំរុញឲ្យមានភាពតានតឹងនៅមជ្ឈិមបូព៌ា និងសេណារីយោសង្រ្គាមផ្សេងទៀត»។

សម្តេចប៉ាប ក៏បានអំពាវនាវឲ្យមានការអធិស្ឋានសម្រាប់ «ជនរងគ្រោះជាច្រើននៃសង្រ្គាម» ដោយលើកឡើងជាពិសេសអ៊ុយក្រែន តំបន់ហ្កាហ្សា និងទឹកដីប៉ាឡេស្ទីនផ្សេងទៀត និងអ៊ីស្រាអែល។