សកម្មជនសិទ្ធិមនុស្សនៅសាធារណរដ្ឋ Bashkortostan របស់រុស្ស៊ី នាថ្ងៃពុធ (ទី១៧ ខែមករា) នេះ ត្រូវបានកាត់ទោសឲ្យជាប់ពន្ធនាគារ ៤ឆ្នាំ នៅក្នុងពន្ធនាគារឧបនិវេសន៍ បន្ទាប់ពីតុលាការបានរកឃើញថា អ្នកទោសរូបនោះ មានទោសពីបទញុះញង់ឲ្យមានការស្អប់ខ្ពើមជនជាតិភាគតិច ដែលការសម្រេចនោះបានបណ្តាលឲ្យមានការប៉ះទង្គិចគ្នា រវាងអ្នកគាំទ្រ និងនគរបាល។

បណ្តាញព័ត៌មានជាភាសារុស្សីឯករាជ្យ បានរាយការណ៍ថា នគរបាលបានបាញ់ឧស្ម័នបង្ហូរទឹកភ្នែក និងចាប់ខ្លួនអ្នកតវ៉ា បន្ទាប់ពីមានការប៉ះទង្គិចគ្នាបានផ្ទុះឡើងជាមួយនឹងមនុស្សដ៏ណែនណាន់តាន់តាប់ ដែលបានប្រមូលផ្តុំគ្នា ដើម្បីបង្ហាញការគាំទ្រដល់សកម្មជន លោក Fail Alsynov។ គេនៅមិនដឹងទេថា មានមនុស្សប៉ុន្មាននាក់ដែលត្រូវបានឃុំខ្លួន។

លោក Alsynov ត្រូវបានចោទប្រកាន់ពីបទប្រមាថដល់កម្មករទេសន្តរប្រវេសន៍ នៅក្នុងសុន្ទរកថាដែលលោកបានធ្វើក្នុងខែមេសា ឆ្នាំ២០២៣ អំឡុងការតវ៉ាមួយ ជុំវិញផែនការជីកយករ៉ែមាស នៅសាធារណរដ្ឋ Bashkortostan ដែលមានទីតាំងនៅភ្នំ Ural ភាគខាងត្បូងនៃប្រទេសរុស្ស៊ី នៅក្បែរព្រំដែន រវាងតំបន់អឺរ៉ុប និងអាស៊ី។ អ្នកគាំទ្ររបស់លោក បាននិយាយថា ករណីប្រឆាំងនឹងលោកត្រូវបានកំណត់ឡើងវិញ ដែលជាការសងសឹក ចំពោះតួនាទីរបស់លោក ក្នុងការតវ៉ាជាច្រើនឆ្នាំមុន ដែលសកម្មជនរូបនេះបានរារាំងគម្រោងជីករករ៉ែសូដានៅលើភ្នំដែលប្រជាជនក្នុងតំបន់ចាត់ទុកថា ជាទីកន្លែងសពិសិដ្ឋ។

បន្ទាប់ពីការចេញសាលក្រម លោក Alsynov បានប្រាប់អ្នកសារព័ត៌មានពីប្រព័ន្ធផ្សព្វផ្សាយអនឡាញ RusNews ថា៖ «អរគុណជាអនេកចំពោះអ្នករាល់គ្នា ដែលមកគាំទ្រខ្ញុំ។ ខ្ញុំនឹងមិនភ្លេចថ្ងៃនេះនោះទេ។ ខ្ញុំសូមបដិសេធថា ខ្ញុំមិនបានធ្វើខុសឡើយ។ ខ្ញុំតែងតែតស៊ូដើម្បីយុត្តិធម៌ ដើម្បីប្រជាជនរបស់ខ្ញុំ និងដើម្បីសាធារណរដ្ឋរបស់ខ្ញុំ»។

សូមបញ្ជាក់ថា ការតវ៉ាក្នុងទ្រង់ទ្រាយធំនៅរុស្ស៊ី គឺកម្រកើតមានណាស់ ដោយសារតែហានិភ័យនៃការចាប់ខ្លួន ជុំវិញការជួបជុំណាមួយ ដែលអាជ្ញាធរចាត់ទុកថា គ្មានការអនុញ្ញាត។ ហើយក្នុងរយៈពេល២ឆ្នាំកន្លងមកនេះ មនុស្សរាប់ពាន់នាក់ត្រូវបានឃុំខ្លួនពីបទប្រឆាំងនឹងសង្គ្រាមនៅអ៊ុយក្រែន៕