នាយកប្រតិបត្តិរបស់សហភាពអឺរ៉ុប (EU) នៅថ្ងៃពុធ (ទី១៧ ខែមករា) នេះ បានសម្តែងការជឿជាក់ថា ប្រទេសសមាជិកទាំង២៧ របស់ប្លុកនេះ នឹងយល់ព្រមរួមគ្នាក្នុងការពង្រីកជំនួយហិរញ្ញវត្ថុបន្ថែមទៀតដល់អ៊ុយក្រែន។

គួរបញ្ជាក់ដែរថា ប្រទេសហុងគ្រីបានប្រឆាំងនឹងកិច្ចព្រមព្រៀងស្ដីពីកញ្ចប់ជំនួយ ដែលបង្កើនលទ្ធភាពដល់ប្រទេសចំនួន២៦ ផ្សេងទៀតផ្តល់មូលនិធិដល់អ៊ុយក្រែន ក្រោមកិច្ចព្រមព្រៀងទ្វេភាគីដាច់ដោយឡែកជាមួយទីក្រុងគីវ។ ប៉ុន្តែលោកស្រី Ursula von der Leyen ដែលជាប្រធានគណៈកម្មការប្រតិបត្តិអឺរ៉ុប បានប្រាប់សមាជិកសភាសហភាពអឺរ៉ុបថា៖ «ខ្ញុំមានទំនុកចិត្តថា យើងនឹងរកឃើញដំណោះស្រាយ នៅថ្ងៃទី២៧»។

មេដឹកនាំសហភាពអឺរ៉ុប កាលពីខែមុនបានយល់ព្រមចាប់ផ្តើមកិច្ចចរចាចូលជាសមាជិកជាមួយអ៊ុយក្រែន ប៉ុន្តែហុងគ្រីបានវេតូចំពោះការផ្តល់ជំនួយចំនួន ៥០ពាន់លានអឺរ៉ូ (៥៤ពាន់លានដុល្លារ) សម្រាប់ទីក្រុងគីវ រហូតដល់ឆ្នាំ២០២៧។

បណ្ដាមេដឹកនាំប្រទេសទាំង២៧ របស់ប្លុក នឹងជួបប្រជុំគ្នាម្តងទៀត នៅទីក្រុងប៊្រុចសែល ប្រទេសបែលហ្ស៊ិក នៅថ្ងៃទី១ ខែកុម្ភៈ ដើម្បីព្យាយាមឲ្យមានការយល់ព្រមលើការផ្តល់ជំនួយហិរញ្ញវត្ថុបន្ថែមទៀតដល់ទីក្រុងគីវ ដែលពឹងផ្អែកខ្លាំងលើការគាំទ្ររបស់លោកខាងលិច ដើម្បីការពារខ្លួនប្រឆាំងនឹងកងកម្លាំងរុស្ស៊ីដែលបានលុកលុយកាលពីជិត ២ឆ្នាំមុន៕