អគ្គលេខាធិការអង្គការសហប្រជាជាតិ (UN) លោក Antonio Guterres បាននិយាយនៅថ្ងៃពុធ (ទី១៧ខែមករា) នេះថា ភាគីជម្លោះ នៅតំបន់ហ្កាហ្សា កំពុង «ជាន់ឈ្លី» ច្បាប់អន្តរជាតិ ហើយបានជំរុញឲ្យភាគីទាំងអស់អនុវត្តបទឈប់បាញ់មនុស្សធម៌ជាបន្ទាន់។

ដោយថ្លែងនៅឯវេទិកាសេដ្ឋកិច្ចពិភពលោក (WEF) នៅទីក្រុង Davos ប្រទេសស្វីស លោក Guterres បាននិយាយថា បណ្ដាភាគីជម្លោះកំពុង «មិនអើពើនឹងច្បាប់អន្តរជាតិ ជាន់ឈ្លីអនុសញ្ញាទីក្រុងហ្សឺណែវ និងថែមទាំងរំលោភលើធម្មនុញ្ញអង្គការសហប្រជាជាតិ» ទៀតផង។

លោកបាននិយាយថា៖ «ពិភពលោកកំពុងបានត្រឹមតែឈរមើល ខណៈដែលជនស៊ីវិល ដែលភាគច្រើនជាស្ត្រី និងកុមារ ត្រូវបានសម្លាប់ ត្រូវបានធ្វើឲ្យពិការ រងនូវការទម្លាក់គ្រាប់បែក ត្រូវបានបង្ខំចេញពីផ្ទះសម្បែងរបស់ពួកគេ និងត្រូវបានបដិសេធមិនឲ្យទទួលបានជំនួយមនុស្សធម៌។ ជាថ្មីម្ដងទៀត ខ្ញុំអំពាវនាវឲ្យមានបទឈប់បាញ់មនុស្សធម៌ជាបន្ទាន់ នៅតំបន់ហ្កាហ្សា និងដំណើរការដែលនាំទៅរកសន្តិភាពប្រកបដោយនិរន្តរភាព សម្រាប់អ៊ីស្រាអែល និងប៉ាឡេស្ទីន ដោយផ្អែកលើដំណោះស្រាយរដ្ឋ២»។

នាយករដ្ឋមន្ត្រីអ៊ីស្រាអែល លោក Benjamin Netanyahu បានច្រានចោលការអំពាវនាវឲ្យមានបទឈប់បាញ់ ដោយនិយាយថា អ៊ីស្រាអែលនឹងបន្តការវាយលុករបស់ខ្លួន នៅតំបន់ហ្កាហ្សា រហូតដល់ខ្លួនអាចកម្ចាត់ក្រុមហាម៉ាស និងសង្គ្រោះចំណាប់ថ្នូរ ដែលត្រូវបានចាប់យកទៅទីនោះ អំឡុងការវាយឆ្មក់ព្រៃផ្សៃដោយខ្មាន់កាំភ្លើងក្រុមហាម៉ាស កាលពីថ្ងៃទី៧ ខែតុលា។

ការទម្លាក់គ្រាប់បែករបស់អ៊ីស្រាអែល និងការវាយលុកផ្លូវគោក នៅក្នុងតំបន់ប៉ាឡេស្ទីន ដែលជាការឆ្លើយតបទៅនឹងការវាយប្រហាររបស់ពួកហាម៉ាសនោះ បានជំរុញប្រជាជនភាគច្រើននៃតំបន់ហ្កាហ្សាចំនួន ២,៣លាននាក់ ចេញពីផ្ទះម្បែងរបស់ពួកគេ។ ការវាយប្រហារនេះក៏បានបណ្តាលឲ្យមានវិបត្តិមនុស្សធម៌ធ្ងន់ធ្ងរផងដែរ ដោយសារតែការដឹកជញ្ជូនស្បៀងអាហារ ប្រេងឥន្ធនៈ និងការផ្គត់ផ្គង់ផ្នែកវេជ្ជសាស្រ្ត ត្រូវបានរឹតបន្តឹងយ៉ាងខ្លាំង៕