ក្រសួងការបរទេសរុស្ស៊ីបាននិយាយនៅថ្ងៃពុធ (ទី១៧ ខែមករា) នេះថា ខ្លួនរំពឹងថា ប្រធានាធិបតីរុស្ស៊ី លោក Vladimir Putin និងសមភាគីអ៊ីរ៉ង់ នឹងចុះហត្ថលេខាលើសន្ធិសញ្ញាអន្តររដ្ឋថ្មីមួយ រវាងប្រទេសទាំង២ ក្នុងពេលឆាប់ៗនេះ ដែលស្ថិតក្នុងដំណាក់កាលចុងក្រោយនៃការព្រមព្រៀងគ្នា។

លោកពូទីនបានជួបពិភាក្សារយៈពេល ៥ម៉ោង នៅក្នុងវិមានក្រឹមឡាំងជាមួយប្រធានាធិបតីអ៊ីរ៉ង់លោក Ebrahim Raisi កាលពីខែមុន ចំពេលមានការកើនឡើងនូវទំនាក់ទំនងនយោបាយ ពាណិជ្ជកម្ម និងយោធា រវាងទីក្រុងមូស្គូ និងទីក្រុងតេអេរ៉ង់ ដែលសហរដ្ឋអាមេរិក និងអ៊ីស្រាអែលចាត់ទុកថា ជាក្តីបារម្ភ។

អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានប្រាប់អ្នកសារព័ត៌មាន នៅថ្ងៃពុធនេះថា សន្ធិសញ្ញាថ្មីនេះនឹងពង្រឹងភាពជាដៃគូយុទ្ធសាស្ត្រ រវាងទីក្រុងមូស្គូ និងទីក្រុងតេអេរ៉ង់ ហើយគ្របដណ្តប់លើគ្រប់ជ្រុងជ្រោយនៃទំនាក់ទំនងរបស់ប្រទេសទាំង២។ លោកស្រី Zakharova បាននិយាយថា សន្ធិសញ្ញាថ្មីនេះត្រូវបានគេរំពឹងថា នឹងត្រូវបានចុះហត្ថលេខាក្នុងអំឡុងពេលដែលលោកស្រីបានពិពណ៌នាថា ជាទំនាក់ទំនងមួយក្នុងចំណោមទំនាក់ទំនង នាពេលខាងមុខរវាងប្រធានាធិបតីទាំង២។ អ្នកនាំពាក្យវិមានក្រឹមឡាំង លោក Dmitry Peskov ត្រូវបានដកស្រង់ដោយទីភ្នាក់ងារសារព័ត៌មានរដ្ឋ TASS ដែលនិយាយថា កាលបរិច្ឆេទពិតប្រាកដសម្រាប់កិច្ចប្រជុំ រវាងមេដឹកនាំទាំង២ មិនទាន់ត្រូវបានកំណត់នៅឡើយទែ។

វិមានក្រឹមឡាំងកាលពីខែវិច្ឆិកា បាននិយាយថា រុស្ស៊ី និងអ៊ីរ៉ង់កំពុងលើកកម្ពស់ទំនាក់ទំនងរបស់ពួកគេ «ក្នុងនោះរួមទាំងវិស័យកិច្ចសហប្រតិបត្តិការបច្ចេកទេសយោធា» ផងដែរ ប៉ុន្តែបដិសេធមិនធ្វើអត្ថាធិប្បាយលើការលើកឡើងរបស់សេតវិមាន ដែលថា អ៊ីរ៉ង់អាចកំពុងពិចារណាផ្តល់មីស៊ីលបាលីស្ទិកដល់រុស្ស៊ី៕