​ប្រេស៊ីល៖ ក្រុម​បាតុករ​ដែល​កំពុង​ដើរ​ក្បួន​តវ៉ា​ ចំពោះចំនួន​អ្នក​ស្លាប់​ដោយសារ​ជំងឺ COVID-19 កើន​ឡើង​ខ្ពស់​របស់​ប្រទេស​ប្រេ​ស៊ី​ល ​បាន​ជួបជុំគ្នា​នៅ​ក្នុង​រដ្ឋធានី​ប្រេ​ស៊ី​លី​យ៉ា​កាលពី​ថ្ងៃ​ពុធ​។ ក្រុម​ស្ត្រី​មកពី​តំបន់​មួយ​ចំនួន​ក្នុង​ប្រទេស​ប្រេ​ស៊ី​ល បាន​កាន់​ទង់ជាតិ​ធំៗ​អម​ដោយ​ឈ្មោះ​ជន​រងគ្រោះ​ដែល​បាន​ស្លាប់​ដោយសារ​ជំងឺ COVID-19 នៅ​លើ​ផ្ទាំង​ក្រណាត់​ពណ៌​ខ្មៅ​។

​ស្ត្រី​ម្នាក់​ឈ្មោះ Lourdes Marinho បាន​ចង្អុល​ឈ្មោះ​ជាច្រើន​ ដែល​អ្នកស្រី​បាន​សរសេរ​ដោយ​ខ្លួនឯង​។​ ​អ្នកស្រី Marinho បាន​និយាយ​ថា ​នេះ​គឺជា Patricia ហើយ​នេះ​គឺជា​​ឪពុក​របស់​នាង​ឈ្មោះ Itaré។ ពួក​គាត់​ទាំង​២ ​បាន​ស្លាប់ គាត់​បាន​ស្លាប់​ក្នុង​ពេល ​១​សប្ដាហ៍បន្ទាប់មក​កូនស្រី​រប​ស់​គាត់​បាន​ស្លាប់​តាម​ក្រោយ​។ ​ហើយ​នេះ​ជា​បងថ្លៃ​ស្រី​របស់​អ្នកស្រីឈ្មោះ Nizia Brito ដែល​បាន​ស្លាប់​ផង​ដែរ ​ទាំង​ដែល​គ្មាន​បញ្ហា​សុខភាព​សោះ​នោះ​។​ ការ​តវ៉ា​នេះ​ធ្វើឡើង​នៅ​ខាង​មុខ​សភា​ប្រេ​ស៊ី​ល ខណៈ​ដែល​ព្រឹទ្ធសភា​បន្ត​ព្យាយាម​ការ​ស៊ើបអង្កេត​ លើ​ការ​ដោះ​ស្រាយ​របស់​រដ្ឋាភិបាល​អំពី​ជំងឺ​រាតត្បាត​សកល COVID-19។​

​លោក​ប្រធានាធិបតី Bolsonaro គឺជា​មេដឹកនាំ​ម្នាក់​ ក្នុងចំណោម​មេដឹកនាំ​សំខាន់ៗ​បំផុត​របស់​ពិភព​លោក ​ដែល​ប្រឆាំង​ទៅ​នឹង​ការ​រឹតត្បិត​ទប់ស្កាត់​ការ​ឆ្លង​រាលដាល​ជំងឺ​នេះ ​ដែល​ជារឿយ​ៗ​លោក​តែង​និយាយ​សម្រាល​ពី​ស្ថានភាព​ជំងឺ​នេះ​។ ប្រេ​ស៊ី​ល​មាន​អ្នក​ស្លាប់​ដោយសារ​ជំងឺ COVID-19 ៥០​ម៉ឺន​នាក់​រួច​ទៅ​ហើយ​នៅ​សប្ដាហ៍​នេះ ជា​ចំនួន​ខ្ពស់​បំផុត​បន្ទាប់ពី​សហ​រដ្ឋ​អាមេ​រិក​តែមួយ​ប៉ុណ្ណោះ​៕

អត្ថបទ៖ សុខមាន