កំពង់ឆ្នាំង៖ ស្ពានព្រៃគ្រាំង ស្ថិតក្នុងភូមិបាញ់ឆ្គោល ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង គឺ​ជា​​ស្ពាន​មួយមានសារៈសំខាន់ខ្លាំងដល់ប្រជាកសិករក្នុងការដោះដូរទំនិញ និងដឹក​កសិផល​ទៅមក​។ កាលពីមុនស្ពាននេះ ជាស្ពានឈើ តែត្រូវទឹកស្ទឹងហូរដាច់នៅចុង​ឆ្នាំ២០២២ ធ្វើអោយ​ប្រជា​កសិករ​​ត្រូវ​បង្ខំចិត្តធ្វើដំណើរវៀងតាមផ្លូវផ្សេងដែលចំណាយទាំងពេលវេលា និងថវិកា​ច្រើន​ទៀត​ផង។

លោក សំ សំណាង មេភូមិបាញ់ឆ្គោល ឃុំជ្រៃបាក់បានថ្លែងអោយដឹងថា កន្លង​មក​ស្ពាន​ព្រៃគ្រាំង​នេះ ជាស្ពានឈើ ត្រូវបានប្រជាកសិករនៅភូមិព្រៃខ្មែរ ភូមិអណ្តូងច្រុះ ភូមិគ្រោះ ភូមិជារៅ ក្នុង​ឃុំរលាប្អៀរ និងភូមិបាញ់ឆ្គោល ភូមិត្រពាំងអន ភូមិអូរកំណប់ ភូមិឃ្លៃ ក្នុងឃុំជ្រៃបាក់ ស្រុក​រលាប្អៀរ ខេត្តកំពង់ឆ្នាំង តែងនាំគ្នាប្រើប្រាស់ស្ពានមួយនេះជាប្រចាំ ដោយផ្លូវតាមស្ពាននេះ ជា​ផ្លូវ​កាត់​ចំណេញ​ពេលវេលា និងប្រាក់កាសក្នុងការធ្វើដំណើរ។ តែកាលពីក្នុងឆ្នាំ២០២២ ស្ពានឈើ​មួយ​នេះត្រូ​វបានជំនន់ទឹកភ្លៀង​ដែលហូរតាមស្ទឹង បានកាត់ផ្តាច់ខូចខាតទាំងស្រុង។ ប្រជា​កសិករ​ទាំង​អស់​មិន​បានធ្វើដំណើរតាមស្ពាននេះទៀតឡើយ ។ ក្រោយមក ដោយសារ​មាន​ការ​សហការ​គ្នា​រវាង​មេភូមិទាំង៨ មេឃុំទាំង២ និងលោកអភិបាលស្រុក បានអោយ​មេភូមិបាញ់​ឆ្គោល​ជា​អ្នក​ដឹកនាំ​កសាងស្ពានបេតុងនេះឡើង ទំហំបណ្តោយស្ពាន២០ម៉ែត្រ ទទឹង៤,១០ម៉ែត្រ និង​កំពស់​៦ម៉ែត្រ​។ ការកសាងនេះ ក៏មានការចូលរួមពីក្រុមការងារថ្នាក់ជាតិបានមួយចំនួន លោក​អភិបាល​ស្រុក​រលាប្អៀរបានមួយចំណែក និងប្រជាពលរដ្ឋក្នុងភូមិបានមួយចំនួន។ បើទោះ​ជា​មាន​ការ​ចូល​រួម​យ៉ា​ងនេះក្តី ក៏នៅខ្វះច្រើនផងដែរលើស៊ីម៉ង់ ដែក ខ្សាច់ ថ្មជាដើម។

លោក សេង វិចិត្រ អភិបាលស្រុករលាប្អៀរ បានអោយដឹងថា ដោយសារ​តម្រូវ​ការ​របស់​ប្រជាជន​នៅ​ក្នុង​ឃុំ​ទាំង២ និងការដឹកកសផលផងនោះ លោកបាន​អនុញ្ញាត​អោយ​មេភូមិបាញ់​ឆ្គោល​កសាង​ស្ពាន​បេតុង​នេះ​ឡើង ដោយ​មាន​ការ​ត្រួត​ពិនិត្យ​ជំនាញ​បច្ចេកទេស​ពី​ការិយាល័យ​សាធារណការ​ស្រុក​រលាប្អៀរ៕ កាំង ហុងវាស្នា