ក្រោយអនុវត្តន៍អនុសាសន៍របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា រហូត​មកដល់ថ្ងៃនេះ ក្រសួងមហាផ្ទៃបាន​សម្រេច​បណ្តេញ​មន្រ្តី​នគរបាល​ចេ​ញ​ពី​ក្រប​ខណ្ឌ​ប្រមាណ​៧០​នាក់ បន្ទាប់ពីរកឃើញថាពួកគេប្រើប្រាស់គ្រឿងញៀន និងល្មើសវិន័យរបស់ក្រសួងមហាផ្ទៃ។ នេះ​បើតាមការបញ្ជាក់ពីលោក ទូច សុខៈ អ្នកនាំពាក្យក្រសួងមហាផ្ទៃ។

ថ្លែងប្រាប់ទូរទស្សន៍BTV នាថ្ងៃទី១៨ ខែមករា ឆ្នាំ២០២៤នេះ លោក ទូច សុខៈ បានបញ្ជាក់ថា មាន​មន្រ្តី​នគរបាលមិនក្រោម៨០នាក់ទេ ដែលត្រូវបានរងវិន័យដោយរដ្ឋមន្រ្តីក្រសួងមហាផ្ទៃ ដោយ​ក្នុងចំណោមជាង៨០នាក់នេះ គឺចំនួនជាង៧០នាក់ត្រូវបានបណ្តេញចេញពីក្របខណ្ឌ និងជាង១០នាក់ទៀតត្រូវបានដកតំណែង និងឋានន្តរស័ក្តិ។

កាលពីថ្ងៃទី២១ ខែធ្នូ ឆ្នាំ២០២៣កន្លងទៅនេះ សម្តេចមហាបវរធិបតី ហ៊ុន ម៉ាណែត នាយករដ្ឋ​មន្រ្តី​នៃ​កម្ពុជា បានដាក់បទបញ្ជាយ៉ាងម៉ឺងម៉ាត់ឲ្យក្រសួងមហាផ្ទៃ និងក្រសួងការពារជាតិកម្ពុជា ត្រូវ​បន្សុទ្ធ​កងកម្លាំងប្រដាប់អាវុធទាំងអស់ កុំឱ្យមានពាក់ព័ន្ធ និងប្រើប្រាស់គ្រឿងញៀន ហើយ​ប្រសិន​បើ​​រកឃើញថាកងកម្លាំងណាមានប្រើប្រាស់ ឬពាក់ព័ន្ធគ្រឿងញៀន ត្រូវតែ​បណ្តេញ​ចេញ​ពី​ក្រប​ខណ្ឌភ្លាមៗ ដោយមិន ត្រូវលើកលែងនោះឡើយ។

យ៉ាងណាក៏ដោយរហូតមកដល់ពេលនេះ ទាំងរដ្ឋមន្រ្តីក្រសួងមហាផ្ទៃ និងរដ្ឋមន្រ្តី​ក្រសួង​ការពារ​ជាតិ បានសម្រេចបណ្តេញចេញនូវមន្រ្តីនគរបាល, និងកងយោធពលខេមរភូមិន្ទ មួយ​ចំនួន​ជា​បន្ត​បន្ទាប់​ក្រោយរកឃើញថាពួកគេទាំងនោះជាប់ពាក់ព័ន្ធ និងប្រើប្រាស់នូវសារធាតុញៀន។

លោក ទូច សុខៈ បានបញ្ជាក់បន្ថែមទៀតថា ក្នុងចំណោម​មន្រ្តី​នគរបាល​ដែលត្រូ​វបា​នប​ណ្តេញ​ចេញ​ពី​ក្របខណ្ឌនគរបាល ឬក្រសួងមហាផ្ទៃនោះ មន្រ្តីខ្លះដែលមាន​យស​ស័ក្តិ​ធំ​ត្រូវ​បាន​បញ្ជូន​ទៅ​កាន់​តុលាការដោយសារតែពួកគេជាប់ពាក់ព័ន្ធនឹងបទល្មើសព្រហ្មទណ្ឌ។ លោកបានបញ្ជាក់បន្ថែមទៀតថា ដើម្បី អនុវត្តអនុសាសន៍​ប្រកប​ដោយ​កិត្តិ​បណ្ឌិត​របស់​សម្តេចធិបតី នាយករដ្ឋមន្រ្តី ដើម្បីសម្អាតផ្ទះផងនោះ បានយកវិន័យគ្រួសារមកអនុវត្តន៍ ចំពោះ​មន្រ្តី​ដែលប្រព្រឹត្តល្មើសនឹងកងកម្លាំងនគរបាលជាតិ ជាពិសេស​នោះ​គឺ​អ្នក​ដែល​ប្រើ​ប្រាស់​គ្រឿង​ញៀន​នេះ​តែម្តង ដោយត្រូវបណ្តេញចោល ភ្លាមៗបន្ទាប់ពីរកឃើញថា ពួកគេជាប់ពាក់ព័ន្ធ និ​ង​ប្រើ​ប្រាស់​គ្រៀងញៀននេះ។ លោកបញ្ជាក់បន្ថែមទៀត ថាបទបញ្ជានេះ នឹងធ្វើឲ្យដូចភ្លៀងរលឹម ដោយ​គ្មានថ្ងៃឈប់ឈរនោះឡើយ៕ អត្ថបទ៖ បាន ចក់