មន្ទីរសារធារណការ និងដឹកជញ្ជូនខេត្តកំពង់ចាម បញ្ជាក់ថា ក្នុងឆ្នាំ២០២៣ កន្លងទៅនេះ មាន​រថយន្ត ប្រមាណជាង ២ម៉ឺនគ្រឿង ដែលចូលរួមធ្វើការត្រួតពិនិត្យលក្ខណៈបច្ចេកទេសយានយន្ត នៅ​ក្នុងខេត្តកំពង់ចាម។

លោក ទុយ ស្រ៊ុន ប្រធានការិយាល័យសុវត្ថិភាពចរាចរណ៍ នៃមន្ទីរ​សាធារណការ និង​ដឹកជញ្ជូន​ខេត្ត​កំពង់ចាម បានឲ្យBTVដឹងថា រយៈពេល១២ ខែក្នុងឆ្នាំ២០២៣ មានម្ចាស់យានយន្តចំនួន ២១៩៦៥​គ្រឿង ដែលយករថយន្តរបស់ខ្លួនមកធ្វើការត្រួតពិនិត្យលក្ខណៈបច្ចេកទេស ដែល​នៅ​ក្នុង​​នោះមានប្រភេទរថយន្ត។ លោកប្រធានការិយាល័យ បន្ថែមទៀតថា រថយន្ត​ដែល​មក​ធ្វើ​ការ​ត្រួត​ពិនិត្យ​លក្ខណៈបច្ចេកទេស នៅខេត្តកំពង់ចាម ឆ្នាំនេះមានការ​ថយ​ចុះ​បើ​ធៀប​ទៅ​នឹ​ង​ឆ្នាំ​២០២២ ដោយសារតែក្រសួងមានការប្រើប្រាស់ម៉ាស៊ីនអចល័ត និង​នៅ​តាម​បណ្តាល​ខេត្ត​មួយចំ​នួន​ដូច​ជា៖ ខេត្តកំពង់ធំ និងខេត្តស្វាយរៀង ក៍មានមជ្ឈមណ្ឌលឆៀកផងដែរ។

លោក ទុយ ស្រ៊ុន បញ្ជាក់ទៀតថា ការត្រួតពិនិត្យលក្ខណៈបច្ចេកទេសយានយន្ត ក៏ជាផ្នែក​មួយ​ក្នុង​ការ​កាត់​បន្ថយគ្រោះថ្នាក់ចរាចរណ៍ ដែលបង្ករដោយយានយន្ត ជាពិសេស ក៏ជាការចូល​រួម​ថែ​រក្សា​ហេដ្ឋា​រចនាសម្ព័ន្ធផ្លូវថ្នល់ឲ្យប្រើប្រាស់បានយូរអង្វែង។ លោកប្រធានការិយាល័យ អំពាវនាវ​ដល់​បង​ប្អូន ប្រជាពលរដ្ឋចូលរួមថែរក្សាផ្លូវថ្នល់ឱ្យបានយូរអង្វែង ដែលជាសរសៃឈាម​នៃ​សេដ្ឋកិច្ច រួមគ្នាទប់ស្កាត់គ្រោះ ថ្នាក់ចរាចរណ៍ទាំងអស់គ្នា តាមរយៈ​ការ​ប្រើប្រាស់​រថយន្ត​ដោយ​មិន​កែ​ច្នៃ​ខុស​បច្ចេកទេស ជាពិសេសចូលរួម គោរពច្បាប់ចរណ៍ឲ្យបានគ្រប់ៗគ្នា៕ អត្ថបទ៖ សីហា