អ៊ីស្រាអែល ត្រូវបានគេចោទប្រកាន់ថា បានកំណត់គោលដៅលើក្រុមជនស៊ីវិលប៉ាឡេស្ទីន ដោយគ្មានទំនាក់ទំនងជាមួយក្រុមប្រដាប់អាវុធ ហើយមិនបានបង្កការគំរាមកំហែងដល់កងកម្លាំងអ៊ីស្រាអែលនោះទេ នេះបើតាមសាក្សីនៅតំបន់វេសបែងដែលគ្រប់គ្រងដោយអ៊ីស្រាអែល។

បុរស ៧នាក់ ដែលក្នុងនោះ ៤នាក់ ជាបងប្អូននឹងគ្នា ត្រូវបានសម្លាប់ នៅក្នុងការវាយប្រហារតាមអាកាសរបស់អ៊ីស្រាអែល នៅព្រឹកព្រលឹមថ្ងៃទី៧ ខែមករា ខណៈដែលពួកគេអង្គុយជុំវិញភ្នក់ភ្លើង នៅក្បែរផ្លូវកាត់ភូមិ អាល់ស៊ុហាដា (al-Shuhada) មានចម្ងាយ ១០ គីឡូម៉ែត្រពីទីក្រុងជេនីន (Jenin)។

សារព័ត៌មាន BBC បាននិយាយទៅកាន់សាច់ញាតិរបស់បុរស ដែលត្រូវបានសម្លាប់ ក្រុមសាក្សីនៅក្នុងតំបន់នៅពេលនោះ និងគ្រូពេទ្យនៅកន្លែងកើតហេតុ។ ពួកទាំងអស់គ្នា បានផ្តល់ភ័ស្តុតាងរឹងមាំ ដែលថាបុរសទាំងនោះ មិនមែនជាសមាជិកនៃក្រុមសកម្មប្រយុទ្ធប្រដាប់អាវុធទេ ហើយថា គ្មានការប៉ះទង្គិចជាមួយកងកម្លាំងអ៊ីស្រាអែល កំពុងកើតឡើង នៅក្នុងទីតាំងនេះ នៅពេលនោះទេ។

លោកខាលីដ អាល់ អាម៉េដ (Khalid al-Ahmad) ដែលជាគ្រូពេទ្យដំបូងគេដែលមកដល់ព្រឹកនោះ ត្រូវបានគេជឿជាក់ថា បុរសទាំងនោះ មិនបានធ្វើអ្វីខុសទេ។

លោកបានប្រាប់សារព័ត៌មានBBCថា៖«ម្នាក់ក្នុងចំណោមពួកគេ ពាក់ស្បែកជើងសម្រាប់ពាក់នៅផ្ទះ និងស្លៀកសំលៀកបំពាក់ដេកយប់។ ប្រសិនបើគេជាអ្នកដែលចង់ប្រឆាំងនឹង[ការកាន់កាប់របស់អ៊ីស្រាអែល] មែននោះ យ៉ាងហោចណាស់ រូបគេ អាចពាក់ស្បែកជើងល្អជាងនេះហើយ»។

កងកម្លាំងការពារអ៊ីស្រាអែល (IDF) បានភ្ជាប់ការវាយប្រហារទៅនឹងប្រតិបត្តិការយោធាប៉ុន្មានម៉ោងមុននេះ នៅក្នុងជំរុំជនភៀសខ្លួនជេនីន (Jenin) ដែលក្នុងនោះ ទាហានស្រីម្នាក់ ត្រូវបានសម្លាប់។