បេក្ខជនប្រជែងតំណែងប្រធានាធិបតីឥណ្ឌូនេស៊ី បានប្ដេជ្ញាពង្រឹងទីភ្នាក់ងារប្រឆាំងអំពើពុករលួយរបស់រដ្ឋាភិបាល ដោយដាក់ចេញផែនការរបស់ពួកគេ នៅមុនការបោះឆ្នោតថ្ងៃទី១៤ ខែកុម្ភៈរបស់ប្រទេស ដើម្បីប្រយុទ្ធប្រឆាំងនឹងអំពើពុករលួយដែលរីករាលដាល នៅក្នុងប្រទេសសេដ្ឋកិច្ចដ៏ធំបំផុតរបស់អាស៊ីអាគ្នេយ៍មួយនេះ។

ការសន្យារបស់បេក្ខជនទាំងអស់ដែលបានធ្វើឡើងនៅក្នុងកិច្ចសន្ទនាមួយ កាលពីល្ងាចថ្ងៃពុធ (ទី១៧ ខែមករា) កើតឡើងនៅពេលដែលអ្នកជំនាញបានសម្តែងការសោកស្ដាយចំពោះការយឺតយ៉ាវ ក្នុងការប្រយុទ្ធប្រឆាំងនឹងអំពើពុករលួយរបស់ប្រទេសនេះ ចំពេលមានការថយចុះនៃអំណាចរបស់គណៈកម្មការលុបបំបាត់អំពើពុករលួយដ៏មានឥទ្ធិពលពីមុន ដែលត្រូវបានគេស្គាល់ដោយអក្សរឥណ្ឌូនេស៊ីថា «KPK»។

ការបោះឆ្នោតនេះ មើលឃើញថា បេក្ខជននាំមុខ គឺលោក Prabowo Subianto ដែលជារដ្ឋមន្ត្រីក្រសួងការពារជាតិ និងជាអតីតឧត្តមសេនីយ៍ឯក ប្រឈមជាមួយអតីតអភិបាលខេត្ត លោក Ganjar Pranowo និងលោក Anie Baswedan។ លោក Anies ដែលជាអតីតអភិបាលរដ្ឋធានីហ្សាការតា បាននិយាយថា លោកនឹងធ្វើឲ្យការប្រយុទ្ធប្រឆាំងអំពើពុករលួយរបស់ឥណ្ឌូនេស៊ីត្រឡប់មកកាន់ផ្លូវដ៏ត្រឹមត្រូវវិញ ដោយការពង្រឹង KPK និងកែសម្រួលច្បាប់គ្រប់គ្រងទីភ្នាក់ងារនេះ។

ច្បាប់នេះត្រូវបានធ្វើវិសោធនកម្មនៅឆ្នាំ២០១៩ ហើយអ្នកជំនាញបាននិយាយថា វិសោធនកម្មនោះបានធ្វើឲ្យ KPK ចុះខ្សោយ ដោយរារាំងដល់សេរីភាពរបស់ស្ថាប័ន ក្នុងការតាមដានជនសង្ស័យតាមរយៈខ្សែទូរស័ព្ទ និងដោយចាត់ថ្នាក់អ្នកស៊ើបអង្កេតឯករាជ្យរបស់ស្ថាប័នជាមន្ត្រីរាជការដែលរាយការណ៍ទៅរដ្ឋាភិបាល។ ការកែប្រែដែលធ្វើឡើងក្រោមប្រធានាធិបតីបច្ចុប្បន្នលោក Joko Widodo ដែលត្រូវបានគេស្គាល់ថា Jokowi បានបង្កឲ្យមានការតវ៉ាទ្រង់ទ្រាយធំនាពេលនោះ។

ចំណែកបេក្ខជននាំមុខគេ លោក Prabowo បាននិយាយថា លោកនឹងចាត់វិធានការ «ជាក់ស្តែង» ដើម្បីទប់ស្កាត់ករណីពុករលួយ ដោយការដំឡើងប្រាក់បៀវត្សរ៍ដល់មន្ត្រីរដ្ឋដែលត្រូវបានប្រគល់ឲ្យនូវថវិកាដ៏ច្រើន ដោយលើកឡើងពីឧទាហរណ៍ ចំពោះចៅក្រម និងមន្ត្រីនៅក្រសួងផ្ទាល់ខ្លួនរបស់លោក ដែលទទួលខុសត្រូវលើលទ្ធកម្មផ្នែកយុទ្ធោបរណ៍យោធា។ រីឯលោក Ganjar អតីតអភិបាលខេត្ត Central Java (ជ្វាកណ្ដាល) និងជាបេក្ខជននៃគណបក្សរបស់ប្រធានាធិបតីលោក Jokowi បានសន្យាថា នឹងស្តារឯករាជ្យភាពរបស់ KPK ជំរុញឲ្យមានសវនកម្មនៃទីភ្នាក់ងាររដ្ឋាភិបាល និងធានាថា ទ្រព្យសម្បត្តិត្រូវបានរឹបអូសពីអ្នកដែលត្រូវបានផ្តន្ទាទោសពីបទប្រព្រឹត្តអំពើពុករលួយ៕