សភានីតិបញ្ញត្តិរបស់ប្រទេសវៀតណាម នៅថ្ងៃព្រហស្បតិ៍ (ទី១៨ ខែមករា) នេះ បានអនុម័តច្បាប់ថ្មីដែលបន្ថយចំនួនភាគហ៊ុនអតិបរមាដែលវិនិយោគិនអាចកាន់កាប់នៅក្នុងធនាគារក្នុងស្រុក ដែលជាវិធានការមួយក្នុងគោលបំណងកាត់បន្ថយហានិភ័យនៃឧបាយកលទីផ្សារ ប៉ុន្តែវាអាចធ្វើឲ្យការវិនិយោគ នៅក្នុងធនាគារផ្តល់ឥណទានមានភាពទាក់ទាញតិច។

ក្រោមកំណែទម្រង់ដែលនឹងចូលជាធរមាន ចាប់ពីខែកក្កដាឆ្នាំនេះ ម្ចាស់ភាគហ៊ុនតាមស្ថាប័ន ដូចជាការវិនិយោគ ឬមូលនិធិសោធននិវត្តន៍ជាដើម នឹងត្រូវបានអនុញ្ញាតឲ្យកាន់កាប់ រហូតដល់ ១០ភាគរយនៃភាគហ៊ុនរបស់ធនាគារមួយ ដែលធ្លាក់ចុះពីការកម្រិតបច្ចុប្បន្ន ១៥ភាគរយ។ សមាជិកសភាជាង ៩០ភាគរយ បានយល់ស្របនឹងច្បាប់ដែលត្រូវបានធ្វើវិសោធនកម្មនេះ។

ការសម្រេចនេះ បានធ្វើឡើងបន្ទាប់ពីមានការលាតត្រដាង កាលពីចុងឆ្នាំ២០២២ ពីការក្លែងបន្លំហិរញ្ញវត្ថុដ៏ធំបំផុតរបស់ប្រទេសវៀតណាម រហូតមកដល់បច្ចុប្បន្ន ដែលមហាសេដ្ឋីអចលនទ្រព្យ លោកស្រី Truong My Lan ត្រូវបានគេចោទប្រកាន់ថា បានផ្ទេរយកប្រាក់ចំនួន ១២,៥ពាន់លានដុល្លារពីធនាគារឯកជនដ៏ធំបំផុតមួយរបស់វៀតណាម គឺធនាគារ Saigon Joint Stock Commercial Bank (SCB) ដោយសារការគ្រប់គ្រងប្រកបដោយប្រសិទ្ធភាពទៅលើអ្នកឲ្យខ្ចីតាមរយៈក្រុមអ្នកតំណាង។

អ្នកគាំទ្រនៃច្បាប់ថ្មីនេះ រំពឹងថា ការកម្រិតកាន់តែតឹងរ៉ឹងលើកម្មសិទ្ធិ អាចធ្វើឲ្យវាពិបាកដល់ឧបាយកលស្រដៀងគ្នានេះ កើតឡើងម្តងទៀត ប៉ុន្តែក្រុមអ្នកជំទាស់ ព្រមានថា ប្រហែលជាមិនមានប្រសិទ្ធភាពទេ ដោយសារច្បាប់ចាស់ មិនបានទប់ស្កាត់ការក្លែងបន្លំនោះឡើយ។ ក្រុមអ្នករិះគន់ រួមទាំងសមាជិកសភាផង ក៏បានព្រមានក្នុងអំឡុងពេលជជែកដេញដោលជាសាធារណៈថា កំណែទម្រង់នេះ អាចមានឥទ្ធិពលអវិជ្ជមាន ក្នុងការកាត់បន្ថយការវិនិយោគក្នុងធនាគារ នៅពេលដែលប្រព័ន្ធធនាគាររបស់វៀតណាមប្រឈមនឹងការកើនឡើងនៃប្រាក់កម្ចីមិនល្អ និងហានិភ័យនៃការហៀរចេញពីវិបត្តិវិស័យអចលនទ្រព្យដែលកំពុងបន្តមាន៕