ក្រុមសិទ្ធិមនុស្សបាននិយាយថា បុរសជនជាតិថៃម្នាក់ត្រូវបានកាត់ទោសឲ្យជាប់ពន្ធនាគាររយៈពេល ៥០ ឆ្នាំ នៅថ្ងៃព្រហស្បតិ៍ (ទី១៨ ខែមករា)នេះ ពីបទការរិះគន់របបរាជានិយម ដែលនេះជាការជាប់ពន្ធនាគាររយៈពេលយូរបំផុតមិនធ្លាប់មាន ក្រោមច្បាប់ប្រមាថព្រះមហាក្សត្រដ៏តឹងរឹងរបស់ព្រះរាជាណាចក្រនេះ។

ការកាត់ទោសបំបែកកំណត់ត្រានេះកើតមានឡើងបន្ទាប់ពីជាច្រើនឆ្នាំដែលប្រទេសថៃ បានបង្កើនការប្រើប្រាស់ច្បាប់ដ៏ចម្រូងចម្រាស ប្រឆាំងនឹងពួកបាតុករគាំទ្រលទ្ធិប្រជាធិបតេយ្យ ជាអ្វីដែលអ្នករិះគន់និយាយថា ជាយុទ្ធសាស្ត្រដើម្បីបំបិទមាត់អ្នកប្រឆាំង។

តុលាការឧទ្ធរណ៍នៅភាគខាងជើងខេត្ត Chiang Rai (ឈៀងរ៉ាយ) បានកាត់ទោសលោក Mongkol Thirakot (មង្គល ធីរ៉ាកត) អាយុ ៣០ឆ្នាំ ដែលជាអតីតសកម្មជនគាំទ្រលទ្ធិប្រជាធិបតេយ្យឲ្យជាប់ពន្ធនាគារចំនួន ៥០ឆ្នាំ ពាក់ព័ន្ធនឹងការបង្ហោះនៅលើគណនីហ្វេសប៊ុកផ្ទាល់ខ្លួនរបស់លោក។

ដំបូងឡើយ រូបលោកត្រូវបានកាត់ទោសឲ្យជាប់ជាប់ពន្ធនាគារ ២៨ឆ្នាំ ដោយតុលាការព្រហ្មទណ្ឌកម្រិតស្រាល ប៉ុន្តែត្រូវបានរកឃើញថា មានទោសចំនួន ១១ករណីបន្ថែមទៀត ក្នុងអំឡុងពេលបណ្តឹងឧទ្ធរណ៍របស់លោក ដែលនាំឲ្យមានការដាក់ទោសយូរជាងមុនបន្ថែមទៀត។

សូមបញ្ជក់ថា ច្បាប់ប្រមាថព្រះមហាក្សត្រ ដែលការពារព្រះមហាក្សត្រ Maha Vajiralongkorn និងក្រុមគ្រួសាររាជវង្សដ៏ជិតស្និទ្ធរបស់ព្រះអង្គកុំឲ្យរងការរិះគន់នោះ ជារឿយៗត្រូវបានគេហៅថា ច្បាប់មាត្រា១១២ នៅក្នុងប្រទេសថៃ បន្ទាប់ពីមានកថាខណ្ឌពាក់ព័ន្ធនៃក្រមព្រហ្មទណ្ឌ។

លោក Mongkol ដែលជាម្ចាស់ហាងលក់សម្លៀកបំពាក់អនឡាញ ត្រូវបានចាប់ខ្លួនជាលើកដំបូង ក្នុងឆ្នាំ ២០២១ អំឡុងពេលតវ៉ាទាមទារឲ្យដោះលែងអ្នកទោសនយោបាយ។ បាតុកម្មដែលដឹកនាំដោយពួកយុវជន នៅឆ្នាំ២០២០ និងឆ្នាំ ២០២១ ឃើញមានមនុស្សរាប់ម៉ឺននាក់ដើរតាមផ្លូវ ដោយមានទាមទារជាច្រើនឲ្យផ្លាស់ប្តូរច្បាប់ស្តីពីការប្រមាថព្រះមហាក្សត្រ៕