គណៈកម្មការប្រឆាំងអំពើពុករលួយម៉ាឡេស៊ី (MACC) បានផ្ដល់ដំណឹងព្រមានដល់ពាណិជ្ជករ លោក Mirzan Mahathir នៅក្រោមកថាខណ្ឌទី៣៦ (1)(b) នៃច្បាប់ MACC ឆ្នាំ២០០៩ ដែលតម្រូវឲ្យរូបលោកប្រកាសនូវចលនវត្ថុ និងអចលនវត្ថុទាំងអស់នៅក្នុងកម្មសិទ្ធិរបស់លោក។

នៅក្នុងសេចក្តីថ្លែងការណ៍មួយ នាថ្ងៃព្រហស្បតិ៍ (ទី១៨ ខែមករា)នេះ MACC បានឲ្យដឹងថា ទ្រព្យសម្បត្តិមិនថានៅក្នុង ឬក្រៅប្រទេសនោះឡើយ ត្រូវតែប្រកាសក្នុងរង្វង់រយៈពេល ៣០ថ្ងៃ ចាប់ពីថ្ងៃជូនដំណឹងនេះ។

គណៈកម្មការបានប្រាប់ថា ការជូនដំណឹងនេះត្រូវបានធ្វើឡើងបន្ទាប់ពីកូនប្រុសច្បងរបស់អតីតនាយករដ្ឋមន្ត្រីម៉ាឡេស៊ី លោក Mahathir Mohamad បានបង្ហាញខ្លួននៅទីស្នាក់ការកណ្តាល MACC នៅម៉ោងប្រហែល ៩:៣០នាទី ម៉ោងក្នុងស្រុក នៅព្រឹកថ្ងៃពុធ ដើម្បីជួយដល់ការស៊ើបអង្កេតដែលកំពុងបន្តធ្វើ។ ការស៊ើបអង្កេតកំពុងត្រូវបានធ្វើឡើងក្រោមច្បាប់ MACC ឆ្នាំ២០០៩ ក៏ដូចជាការប្រឆាំងការសម្អាតលុយ ការផ្តល់ហិរញ្ញប្បទានប្រឆាំងភេរវកម្ម និងដំណើរការសកម្មភាពខុសច្បាប់ឆ្នាំ២០០១ (AMLATFPUAA)។

MACC បានចាប់ផ្តើមការស៊ើបអង្កេតក្នុងខែសីហា ឆ្នាំ២០២២ ដែលជាផ្នែកមួយនៃការស៊ើបអង្កេតរបស់ខ្លួនទៅលើអង្គភាពទាំងអស់ដែលបានលើកឡើងនៅក្នុងរបាយការណ៍របស់គេហទំព័រ Pandora Papers និង Panama Papers។ មកដល់ពេលនេះ MACC បាននិយាយថា ខ្លួនបានកោះហៅសាក្សីចំនួន ១០នាក់ សម្រាប់គោលបំណងកត់ត្រាសេចក្តីថ្លែងការណ៍៕