ប្រព័ន្ធផ្សព្វផ្សាយរដ្ឋ KCNA បាននិយាយនៅថ្ងៃសុក្រទី១៩មករាសប្ដាហ៍នេះថា ប្រទេស​កូរ៉េ​ខាង​ជើង​បាន​សាកល្បងប្រព័ន្ធអាវុធនុយក្លេអ៊ែរក្រោមទឹករបស់ខ្លួន បង្ហាញការ​មិន​ពេញ​ចិត្ត​ចំពោះ​សកម្មភាព​សមយុទ្ធយោធារួមគ្នានៅសប្តាហ៍នេះ ពីសំណាក់កូរ៉េខាងត្បូង សហរដ្ឋអាមេរិក និង​ប្រទេស​ជប៉ុន។ 

របាយការណ៍បាននិយាយថា ការសាកល្បងប្រព័ន្ធ ហេល-5-23 (Haeil-5-23) ជាឈ្មោះ​ដែល​កូរ៉េ​ខាង​ជើងបាន​ផ្តល់ដល់យានដ្រូន​វាយ​ប្រហារ​ក្រោម​ទឹកដែល​មាន​សមត្ថភាព​បំពាក់​អាវុធ​នុយក្លេអ៊ែរ ត្រូវបានធ្វើឡើងដោយវិទ្យាស្ថានស្រាវជ្រាវរបស់ក្រសួងការពារជាតិកូរ៉េខាងជើង នៅ​ក្នុង​ដែន​ទឹកក្បែរឆ្នេរសមុទ្រភាគខាងកើតរបស់ខ្លួន ដោយពុំមានការបញ្ជាក់កាលបរិច្ឆេទ។    

យោង​តាមទីភ្នាក់ងារសារព័ត៌មាន KCNA អ្នកនាំ​ពាក្យ​ម្នាក់​ដែល​មិនបញ្ចេញ​ឈ្មោះ​របស់​ក្រសួង​នេះ បាននិយាយនៅក្នុងសេចក្តីថ្លែងការណ៍មួយថា សកម្មភាព​ប្រឆាំង​នុយក្លេអ៊ែ​ក្រោម​ទឹក​របស់​កងទ័ព​របស់យើង កំពុងត្រូវបានពន្លឿនបន្ថែមទៀត ហើយសកម្មភាពឆ្លើយតបតាមដែនសមុទ្រ និង​ក្រោមទឹកជាច្រើនរបស់ខ្លួននឹងបន្តរារាំងសមយុទ្ធយោធាអរិភាពរបស់កងទ័ពជើងទឹកអាមេរិក និង​សម្ព័ន្ធមិត្តរបស់ពួកគេ។     

កងទ័ពជើងទឹករបស់ប្រទេសកូរ៉េខាងត្បូង សហរដ្ឋអាមេរិក និងជប៉ុន បានធ្វើ​សមយុទ្ធ​រួម​គ្នា​រយៈ​ពេល​បី​ថ្ងៃ​ក្នុងសប្តាហ៍នេះរហូតដល់ថ្ងៃពុធទី១៧មករា សប្ដាហ៍នេះ ដោយមាន​ការ​ចូលរួម​ពី​នាវា​ផ្ទុក​យន្ត​ហោះអាមេរិក Carl Vinson ដែលជាផ្នែក​នៃ​កិច្ច​ខិតខំ​ប្រឹង​ប្រែង​ដើម្បី​បង្កើន​ការ​ឆ្លើយ​តប​របស់​ពួក​គេចំពោះការគំរាមកំហែងរបស់កូរ៉េខាងជើងដែលមេដឹកនាំលោក Kim Jong Un បាន​ប្រកាសថាជារដ្ឋមហាអំណាចនុយក្លេអ៊ែរ៕