ភ្នំពេញ៖ ស្ថានទូតឥណ្ឌាប្រចាំនៅកម្ពុជា នៅល្ងាចថ្ងៃទី១៨ ខែមករា ឆ្នាំ២០២៤ បានរៀប​ចំ​ពិធី​សម្ពោធជាផ្លូវការ សភាពាណិជ្ជកម្មឥណ្ឌាប្រចាំប្រទេសកម្ពុជា (IBCC) ក្នុងគោលបំណងជំរុញ​ទំនាក់​ទំនង​ឱ្យកាន់តែរឹងមាំ រវាងសហគមន៍ធុរកិច្ចឥណ្ឌា និងសមភាគីរបស់ពួកគេនៅក្នុងកម្ពុជា ដោយ​ជួយសម្រួលដល់កិច្ចសហការ ការរីកចម្រើន និងភាពជោគជ័យទៅវិញទៅមក។

ពិធីសម្ពោធសភាពាណិជ្ជកម្មឥណ្ឌាប្រចាំប្រទេសកម្ពុជានេះ បាន​ប្រារព្ធ​ធ្វើ​ឡើង​ក្រោម​វត្តមាន​របស់ ឯកឧត្តម ពេជ ឬទ្ធី រដ្ឋលេខាធិការក្រសួងពាណិជ្ជកម្ម និងលោកជំទាវបណ្ឌិត Devyani Khobragade ឯកអគ្គរដ្ឋទូតនៃសាធារណៈរដ្ឋឥណ្ឌាប្រចាំប្រទេសកម្ពុជា និងមាន​ការ​អញ្ជើញ​ចូល​​រួ​ម​ពីតំណាងក្រសួង-ស្ថាប័នរដ្ឋ រួមនឹងពាណិជ្ជករកម្ពុជា និងឥណ្ឌាជាច្រើនរូបផ្សេងទៀត ប្រមាណ​ជាង ២៥០រូប។

នៅក្នុងពិធីនាឱកាសនោះ ឯកឧត្តម ពេជ ឬទ្ធី បាន​សម្តែង​ការ​អបអរ​សាទរ​ជូន​ចំពោះ​ស្ថាន​ទូត​នៃ​សាធារណៈ​រដ្ឋ​ឥណ្ឌា និងសភាពាណិជ្ជកម្មឥណ្ឌាប្រចាំប្រទេសកម្ពុជា ចំពោះការ​បង្កើត​ជា​ផ្លូវការ​នៃ​សភា​ពាណិជ្ជកម្មនេះ ដែលនឹងជំរុញនូវសកម្មភាពពាណិជ្ជកម្ម និងការវិនិយោគ​រវាង​ប្រទេស​ទាំង​ពីរ ពង្រឹងនូវកិច្ចសហប្រតិបត្តិការ រវាងធុរកិច្ច និងផ្តល់​នូវ​កាលា​នុវត្តន៍​ផ្នែក​សេដ្ឋកិច្ច​ និង​ពាណិជ្ជ​កម្ម​កម្ពុជា-ឥណ្ឌា។ ជាមួយនេះ ឯកឧត្តម ក៏បានជម្រាបជូនអង្គពិធីថា នៅក្នុង​នីតិកាល​ទី៧ នៃរដ្ឋសភានេះ រាជរដ្ឋាភិបាលកម្ពុជា បានចាប់ផ្តើមយុទ្ធសាស្ត្របញ្ចកោណដំណាក់កាលទី១ ដើម្បី​ពង្រឹងការអភិវឌ្ឍវិស័យឯកជន ការធ្វើពិពិធកម្មសេដ្ឋកិច្ច និងការលើក​កម្ពស់​ការ​ប្រកួត​ប្រជែង​ តាមរយៈការធ្វើឱ្យប្រសើរឡើងនូវបរិយាកាសធុរកិច្ច និងវិនិយោគ ពង្រឹងការតភ្ជាប់ និង​ការ​បង្កើតតំបន់សេដ្ឋកិច្ចពិសេសដែលកាន់តែមានភាពទាក់ទាញសម្រាប់អ្នកវិនិយោគ។

លោកជំទាវ ឯកអគ្គរដ្ឋទូត មានប្រសាសន៍ថា កម្ពុជា គឺជាប្រទេស​ដែល​មាន​សេដ្ឋកិច្ច​ដំណើរ​ការ​ល្អ​មួយ​នៅអាស៊ី។ កម្ពុជាបានរក្សាកំណើនខ្ពស់ក្នុងអត្រាជាមធ្យម ៧% អស់រយៈពេលជាង ២​ទសវត្សរ៍ មុនពេលជំងឺរាតត្បាតកូវីដ។ លោកជំទាវ បានបន្តថា បន្ទាប់ពីជំងឺរាតត្បាតកូវីដ១៩ ការ​ស្ទុះ​ងើប​ឡើងវិញនៃសេដ្ឋកិច្ចរបស់កម្ពុជាបានរឹងមាំនៅឆ្នាំ២០២២។ ប្រទេសកម្ពុជា គ្រោង​នឹង​ប្រែក្លាយ​ឋានៈជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០។ លោកជំទាវ បន្ថែម​ទៀត​ថា គំនិតផ្តួចផ្តើមរបស់រាជរដ្ឋាភិបាល ក្រោមការដឹកនាំរបស់សម្ដេចនាយករដ្ឋមន្រ្តី ហ៊ុន ម៉ាណែត ប្រាកដណាស់ថា កម្ពុជានឹងកំណត់អត្រាកំណើន ៧% ម្តងទៀត។

នាឱកាសនោះ លោកជំទាវ បានបញ្ជាក់ថា សភាពាណិជ្ជកម្មឥណ្ឌានៅកម្ពុជា និង​ការ​ជួប​ប្រជុំ​គ្នា​លើក​នេះ គឺដើរតួនាទី​យ៉ាង​សំខាន់​សម្រាប់​ធុរកិច្ច​ឥណ្ឌា​ក្នុង​ការ​ស្វែង​រក​ឱកាស​ថ្មីៗ​សម្រាប់​ការ​វិនិយោគ​នៅ​ក្នុងប្រទេសកម្ពុជា ពិសេសនឹងផ្តល់នូវវេទិកា ដ៏សំខាន់សម្រាប់ធុរកិច្ចឥណ្ឌា និង​កម្ពុជា ដើម្បីបង្កើតបណ្តាញ ផ្លាស់ប្តូរគំនិត និងសហការគ្នាទៅវិញទៅមក៕