បណ្ណកម្មសិទ្ធិដីធ្លី ជាង៣ពាន់ក្បាលដី ត្រូវបានមន្រ្តីជំនាញសូរិយោដី បានចែក​ជូន​ដល់​ប្រជាពលរដ្ឋ នៅក្នុងភូមិក្រាំងតាមុំ ឃុំតាំងក្រសាំង ស្រុកទឹកផុស ខេត្តកំពង់ឆ្នាំង ។ ប្រជាពលរដ្ឋ សប្បាយ​ចិត្ត លែង មានការព្រួយបារម្ភចំពោះការកើតមានទំនាស់ទៀតឡើយ ។

ប្រជាពលរដ្ឋ បានឱ្យដឹងថា កន្លងមកសម្តេចតេជោ ហ៊ុន សែន អតីតនាយករដ្ឋមន្ត្រី បានយកចិត្ត ទុក​ដាក់​លើ​សុខទុក្ខប្រជាពលរដ្ឋនៅគ្រប់ទីកន្លែងដោយមិនរើសអើងនិន្នាការអ្វីឡើយ។ មកដល់​សម្តេចធិបតី ហ៊ុន ម៉ាណែត នាយករដ្ឋមន្ត្រី ក៏រឹតតែ​យក​ចិត្ត​ទុក​ដាក់​ដល់​សុខទុក្ខ​ប្រជា​ពលរដ្ឋ​ទ្វេឡើង​។ សម្តេចបានឱ្យក្រុមការងារក្រសួងដែនដី ចុះវាស់វែងក្បាលដី​ដែល​នៅ​សេស​សល់​ជូន​ប្រជាព​លរដ្ឋឱ្យបានលឿន ដើម្បីបញ្ជៀស និងបញ្ចប់នូវរាល់ទំនាស់នានា និងឲ្យប្រជាពលរដ្ឋ​ទទួល​បាន​នូវសិទ្ធិកាន់កាប់ ប្រើប្រាស់ និងបែងចែកដីធ្លីដោយស្របច្បាប់ ។ ប្រជា​ពលរដ្ឋ​ទាំង​អស់​សប្បាយ​ចិត្ត​ខ្លាំង និងសូមអរគុណដល់សម្តេច ទាំងទ្វេផងដែរ។

លោក លី សុភា ប្រធានមន្ទីររៀបចំដែនដី នគរូបនីយកម្ម សំណង់ និងសូរិយោដី ខេត្តកំពង់ឆ្នាំង បាន​បញ្ជាក់ថា ជាច្រើនជំនាន់មកហើយ ប្រជាពលរដ្ឋនៅក្នុងតំបន់ខ្លះ មិនដែលមាន​បណ្ណ​កម្ម​សិទ្ធិ​ដីធ្លី​នោះទេ កត្តានេះវាមានមូលហេតុជាច្រើន ពិសេសគឺសង្រ្គាមតែម្តង។ ទើបតែ​សម័យ​បច្ចុប្បន្ន​នេះ ​រាជរដ្ឋាភិបាល បានចំណាយទាំងថវិកា និងធនធានមនុស្ស ចុះធ្វើការវាស់វែង និងប្រមូ​ល​ទិន្នន័យ​ដីធ្លីតាំងពីបទបញ្ជា លេខ០១ ស្របតាមគោលនយោបាយចាស់ សកម្មភាពថ្មី ក្នុងគោល​បំណង​ឲ្យ​ប្រជាពលរដ្ឋទទួលបាននូវ សិទ្ធិកាន់កាប់ ប្រើប្រាស់ និងបែងចែកដីធ្លី ដោយ​ស្រប​ច្បាប់​គ្រប់គ្នា៕ អត្ថបទ៖ កាំង ហុងវាស្នា