មន្ត្រីខេត្តរបស់អ៊ីរ៉ង់ម្នាក់បាននិយាយកាលពីថ្ងៃព្រហស្បតិ៍ (១៨ មករា) ថាជនជាតិប៉ាគីស្ថាន ១០នាក់ ត្រូវបានសម្លាប់នៅក្នុងការវាយប្រហារដោយកងទ័ពប៉ាគីស្ថាន លើខេត្ត ស៊ីស្ថាន អែន បាឡុឆេស្ថាន (Sistan and Baluchestan) ភាគអាគ្នេយ៍របស់ប្រទេសអ៊ីរ៉ង់ នេះបើយោងតាមទីភ្នាក់ងារព័ត៌មានផ្លូវការរបស់អ៊ីរ៉ង់ IRNA ។

ខណៈពេលដែលនិយាយយ៉ាងលម្អិតអំពីព័ត៌មានលម្អិតនៃការវាយប្រហារ ដែលបានកំណត់គោលដៅភូមិព្រំដែនក្បែរស្រុក សារ៉ាវ៉ាន (Saravan) របស់អ៊ីរ៉ង់នេះ អភិបាលរងខេត្ត ស៊ីស្ថាន អែន បាឡុឆេស្ថាន ទទួលបន្ទុកសន្តិសុខ និងអនុវត្តច្បាប់ លោក អាលីរ៉េហ្សា ម៉ាហាម៉ាទី (Alireza Marhamati) បាននិយាយថា ការវាយប្រហារដែលធ្វើឡើងដោយយានដ្រូនចំនួន ៣គ្រឿង នៅម៉ោងប្រហែល ០៤:៣០នាទីព្រឹក (ម៉ោងក្នុងស្រុក) បានបំផ្លាញលំនៅឋានប្រជាពលរដ្ឋចំនួន ៤ខ្នង។

នៅពេលត្រូវបានសាកសួរឱ្យធ្វើអត្ថាធិប្បាយលើការវាយប្រហាររបស់ប៉ាគីស្ថាន រដ្ឋមន្ត្រីក្រសួងមហាផ្ទៃអ៊ីរ៉ង់ លោក អាម៉ាដ វ៉ាហ៊ីឌី (Ahmad Vahidi) បាននិយាយថា ជនបរទេសប្រាំបួននាក់ ត្រូវបានសម្លាប់នៅក្នុង «ការបំផ្ទុះ» នៅភូមិព្រំដែនភាគអាគ្នេយ៍ ដោយបន្ថែមថា ជនរងគ្រោះរួមមានកុមារ ៤នាក់ ស្រី ៣នាក់ និងបុរស ២នាក់។

អ្នកនាំពាក្យក្រសួងការបរទេសអ៊ីរ៉ង់ លោក ណាសសឺ ខាណានី (Nasser Kanaani) កាលពីថ្ងៃព្រហស្បតិ៍ បានថ្កោលទោសការវាយប្រហាររបស់ប៉ាគីស្ថាន នៅក្នុងសេចក្តីថ្លែងការណ៍មួយដោយនិយាយថាក្រសួងបានកោះហៅឯកអគ្គរដ្ឋទូតប៉ាគីស្ថាន នៅទីក្រុងតេអេរ៉ង់ ដើម្បីសម្តែងការតវ៉ាជាផ្លូវការរបស់អ៊ីរ៉ង់ និងស្នើសុំការពន្យល់ពីរដ្ឋាភិបាលប៉ាគីស្ថាន ទាក់ទងនឹងឧប្បត្តិហេតុនេះ៕