បណ្ដាប្រមុខរដ្ឋមកពីអាជ្ញាធរអន្តររដ្ឋាភិបាលស្ដីពីការអភិវឌ្ឍន៍ (IGAD) ដែលមានសមាជិក៨ប្រទេស បានជួបប្រជុំគ្នា នៅទីក្រុង Entebbe (អង់តេបបេ) ប្រទេសអ៊ូហ្គង់ដា កាលពីថ្ងៃព្រហស្បតិ៍ (ទី១៨ ខែមករា) ដើម្បីស្វែងរកដោះស្រាយវិបត្តិការទូត ដែលកំពុងកើនឡើង រវាងប្រទេសសូម៉ាលី និងទីក្រុង Addis Ababa (អាឌីសអាបេបា)។

បណ្ដាមេដឹកនាំទាងនោះបានជួបគ្នា ខណៈដែលសូម៉ាលីបានច្រានចោលការពិភាក្សាណាមួយជាមួយប្រទេសអេត្យូពីអំពីកិច្ចព្រមព្រៀងរបស់ទីក្រុងអាឌីសអាបេបា ក្នុងការជួលកំពង់ផែនៅក្នុងតំបន់ផ្ដាច់ខ្លួនរបស់ប្រទេស Somaliland (សូម៉ាលីឡែន)។

ក្រោមអនុស្សរណៈនៃការយោគយល់គ្នាដែលបានចុះហត្ថលេខាកាលពីថ្ងៃទី១ ខែមករា ប្រទេសអេត្យូពីនឹងពិចារណាលើការទទួលស្គាល់ឯករាជ្យភាពរបស់សូម៉ាលីឡែន ជាថ្នូរនឹងការមានសិទ្ធិចូលទៅកាន់សមុទ្រក្រហម មួយផ្នែកតាមរយៈការជួលកំពង់ផែ។

សូម៉ាលីឡែនបានប្រកាសឯករាជ្យពីសូម៉ាលីក្នុងឆ្នាំ១៩៩១ ប៉ុន្តែមិនទទួលបានការទទួលស្គាល់ពីប្រទេសណាមួយឡើយ ហើយកិច្ចព្រមព្រៀងជួលកំពង់ផែដែលនឹងជាប្រយោជន៍ដល់ប្រទេសអេត្យូពី ដែលឥតមានព្រំដែនជាប់សមុទ្រនោះ បានធ្វើឲ្យប្រទេសសូម៉ាលីខឹងសម្បាយ៉ាងខ្លាំង។

ការកើនឡើងនូវសង្គ្រាមពាក្យសម្ដី ក្នុងនោះរួមទាំងការគំរាមកំហែងដោយប្រទេសសូម៉ាលី ក្នុងការធ្វើសង្គ្រាម ដើម្បីរារាំងកិច្ចព្រមព្រៀងមិនឲ្យមានការឆ្លងកាត់ បាននាំឲ្យសហភាពអាហ្រ្វិកអំពាវនាវ កាលពីថ្ងៃពុធ (ទី១៧ ខែមករា) ឲ្យមានការអត់ធ្មត់ និង «ការសន្ទនាប្រកបដោយអត្ថន័យ»៕