ភ្លាមៗបន្ទាប់ពីក្រុមហាម៉ាស បានសម្លាប់ជនជាតិអ៊ីស្រាអែលប្រហែល ១.២០០នាក់ ដែលភាគច្រើនជាជនស៊ីវិល និងបានចាប់ចំណាប់ថ្នូរជាង ២០០នាក់ មន្ត្រីរដ្ឋបាលលោកបៃដិន បានប្រាប់សមាជិកសភា   អាមេរិកឲ្យរៀបចំសមាសភាពរបស់ពួកគេសម្រាប់សង្រ្គាមដ៏យូរ នៅក្នុងតំបន់ហ្កាហ្សា។

រយៈពេលប៉ុន្មានថ្ងៃបន្ទាប់ពីការវាយប្រហារកាលពីថ្ងៃទី៧ ខែតុលា ក្រសួងការពារជាតិ បានចាប់ផ្តើមប្រញាប់ប្រញាល់បញ្ជូនអាវុធទៅកាន់ប្រទេសអ៊ីស្រាអែល រួមទាំងគ្រាប់បែកទំហំតូចអាចរត់ទៅគោលដៅដោយស្វ័យប្រវត្តិ គ្រាប់រំសេវសម្រាប់វាយប្រហារគោលដៅ រថពាសដែក កាំភ្លើងធំ និងគ្រាប់កាំភ្លើងធំ។

សេតវិមាន និងមន្ទីរបញ្ចកោណ បាននិយាយនៅពេលនោះថា ពួកគេនឹងកំណត់ «គ្មានបន្ទាត់ក្រហម» សម្រាប់សកម្មភាពយោធារបស់អ៊ីស្រាអែលនៅតំបន់ហ្កាហ្សា។ រដ្ឋមន្ត្រីការពារជាតិលោក Lloyd Austin បានសង្កត់ធ្ងន់ កាលពីថ្ងៃទី១២ ខែតុលាថា សហរដ្ឋអាមេរិក «មិនបានដាក់លក្ខខណ្ឌណាមួយលើការ      ផ្តល់អាវុធ» និងជំនួយរបស់សហរដ្ឋអាមេរិកសម្រាប់អ៊ីស្រាអែលទេ។

រយៈពេលជាងបីខែក្រោយមក ការវាយប្រហាររបស់អ៊ីស្រាអែល បានសម្លាប់ជនជាតិប៉ាឡេស្ទីនជាង ២៤.000 នាក់ ដែលភាគច្រើនជាជនស៊ីវិល ដោយជាង ៦១.០០០នាក់ បានរងរបួស និងរាប់ពាន់នាក់ទៀតបាត់ខ្លួន ឬកប់នៅក្រោមគំនរបាក់បែក។ ការវាយប្រហារ បានបណ្តាលឲ្យមានការផ្លាស់ទីលំនៅដ៏ធំបំផុតរបស់ប៉ាឡេស្ទីន ចាប់តាំងពីឆ្នាំ ១៩៤៨ ដោយបង្ខំយ៉ាងហោចណាស់ ៨៥ភាគនៃប្រជាជន ២,៣ លាននាក់របស់តំបន់ហ្កាហ្សា ចូលទៅក្នុងតំបន់ ដែលមានទំហំតូចជាង និងមិនអាចរស់នៅបាន ចំពេលក្រុមភ្នាក់ងារជំនួយ បានពិពណ៌នាថាជា «មហាវិនាស»។