ក្រសួងការបរទេសចិន នៅថ្ងៃសុក្រ (ទី១៩ ខែមករា) នេះ បាននិយាយថា ស្ថានភាពនៅតាមព្រំដែនឥណ្ឌា-ចិន មិនគួរប៉ះពាល់ដល់ "ការរីកចម្រើនជាប្រក្រតីនៃទំនាក់ទំនង» រវាងប្រទេសទាំង២ នោះទេ។

ការលើកឡើងបែបនេះដែលបានធ្វើដោយអ្នកនាំពាក្យក្រសួងការបរទេស លោកស្រី Mao Ning នៅទីក្រុងប៉េកាំង បានកើតមានបន្ទាប់ពីមន្ត្រីការិយាល័យគោលនយោបាយឧស្សាហកម្មជាន់ខ្ពស់របស់ឥណ្ឌា លោក Rajesh Kumar Singh បាននិយាយថា ឥណ្ឌាអាចបន្ធូរបន្ថយការត្រួតពិនិត្យដ៏តឹងរ៉ឹងលើការវិនិយោគរបស់ចិន ប្រសិនបើព្រំដែននៃប្រទេសទាំង២ នៅតែមានសន្តិភាពដដែល។

លោកស្រី Mao បាននិយាយថា ប្រទេសចិនសង្ឃឹមថា ឥណ្ឌានឹង «យល់យ៉ាងពេញលេញ» នូវសក្តានុពលនៃកិច្ចសហប្រតិបត្តិការពាណិជ្ជកម្ម និងសេដ្ឋកិច្ចបន្ថែមទៀត រវាងប្រទេសទាំង២ ហើយលោកស្រីបានបន្ថែមថា ឥណ្ឌានឹងផ្តល់នូវបរិយាកាស «យុត្តិធម៌ ត្រឹមត្រូវ តម្លាភាព និងគ្មានការរើសអើង» សម្រាប់ក្រុមហ៊ុនចិន ក្នុងការវិនិយោគ និងប្រតិបត្តិការ នៅក្នុងប្រទេសឥណ្ឌា។

សូមរំលឹកថា កងទ័ពឥណ្ឌា និងចិនបានប៉ះទង្គិចគ្នា ២ដង ក្នុងឆ្នាំ២០២២ ទោះបីជាការចរចាសន្តិភាពកំពុងបន្តធ្វើក៏ដោយ។ ទីក្រុងញូវដេលី និងទីក្រុងប៉េកាំង ដែលបានប្រយុទ្ធគ្នាក្នុងសង្គ្រាមព្រំដែនរយៈពេលខ្លី កាលពីឆ្នាំ១៩៦២ បានធ្វើកិច្ចចរចាការទូត និងយោធាជាបន្តបន្ទាប់ ដើម្បីដោះស្រាយជម្លោះនេះ៕