នៅឯមូលដ្ឋានទ័ពជើងទឹក Yokosuka ក្បែរទីក្រុងតូក្យូ នាថ្ងៃសុក្រ (ទី១៩ ខែមករា) ឯកអគ្គរដ្ឋទូតអាមេរិកប្រចាំប្រទេសជប៉ុន លោក Rahm Emanuel បាននិយាយថា សហរដ្ឋអាមេរិក និងជប៉ុននឹងពិនិត្យមើលនូវលទ្ធភាពនៃការប្រើប្រាស់រោងចក្រផលិតនាវារបស់ជប៉ុន សម្រាប់ធ្វើជាកន្លែងជួសជុលនាវាចម្បាំងរបស់កងទ័ពជើងទឹកអាមេរិក ដែលល្បាតក្នុងដែនទឹកអាស៊ីបូព៌ា។

លោក Emanuel បាននិយាយថា ការជួសជុលនាវា នៅប្រទេសជប៉ុន ជាជាងយកទៅសហរដ្ឋអាមេរិក នឹងជួយលើកកម្ពស់ដល់ការរារាំងផ្នែកយោធានៅក្នុងតំបន់ ដោយរក្សាទុកធនធានយោធានៅនឹងកន្លែង។ ដោយថ្លែងទៅកាន់ក្រុមអ្នកសារព័ត៌មាន មុនបើកពិធីសរសើរកម្មករនៅឯកន្លែងជួសជុលនាវារបស់មូលដ្ឋានទ័ពជើងទឹក លោក Emanuel បានគូសបញ្ជាក់ពីការរារាំងយោធាដែលកាន់តែប្រសើរឡើងប្រឆាំងនឹងចិនថា ជាលទ្ធផលដែលអាចមាននៃផែនការនេះ។

ជប៉ុនគឺជាទីតាំងដែលប្រមូលផ្តុំកម្លាំងយោធានៅបរទេសដ៏ធំបំផុតរបស់សហរដ្ឋអាមេរិក ក្នុងនោះរួមទាំងក្រុមនាវាផ្ទុកយន្តចម្បាំងបញ្ជូនបន្តតែមួយគត់ ដែលប្រតិបត្តិការពីមូលដ្ឋានទ័ពជើងទឹក Yokosuka។ កងនាវាចរទី៧ ដែលវាជាផ្នែកមួយ គ្រប់គ្រងនាវា និងនាវាមុជទឹករហូតដល់ ៧០គ្រឿង ដែលភាគច្រើនមានមូលដ្ឋាននៅប្រទេសជប៉ុន៕