វិមានក្រឹមឡាំង នៅថ្ងៃសុក្រ (ទី១៩ ខែមករា) បាននិយាយថា ខ្លួនសោកស្តាយដែលប្រទេសអាហ្សង់ទីន សម្រេចមិនចូលរួមជាមួយប្លុក BRICS តែសង្ឃឹមថា ទីក្រុង Buenos Aires នឹងពិចារណាឡើងវិញ។

លោកស្រី Diana Mondino រដ្ឋមន្ត្រីការបរទេសថ្មីអាហ្សង់ទីន បាននិយាយកាលពីខែវិច្ឆិកាថា ប្រទេសរបស់លោកស្រីនឹងមិនចូលរួមជាមួយក្រុមប្រទេសកំពុងអភិវឌ្ឍន៍ ឬ BRICS នោះទេ បើទោះបីជាត្រូវបានអញ្ជើញឲ្យចូលរួមក៏ដោយ។ ជំនួសវិញ ប្រធានាធិបតីលោក Javier Milei បានជ្រើសរើសពង្រឹងទំនាក់ទំនងជាមួយសហរដ្ឋអាមេរិក។

តាមរយៈការហៅទូរស័ព្ទជាមួយអ្នកសារព័ត៌មាន អ្នកនាំពាក្យវិមានក្រឹមឡាំង លោក Dmitry Peskov បាននិយាយអំពីការសម្រេចរបស់អាហ្សង់ទីនថា៖ «ពិតណាស់ នេះជារឿងគួរសោកស្តាយ ប៉ុន្តែនេះគឺជាសិទ្ធិអធិបតេយ្យភាពរបស់ប្រទេសអាហ្សង់ទីន ហើយយើងគោរពការសម្រេចណាមួយរបស់ទីក្រុង Buenos Aires។ តែបើតាមគំនិតខ្ញុំ យើងសង្ឃឹមថា ថ្នាក់ដឹកនាំប្រទេសអាហ្សង់ទីន អាចនឹងមើលឃើញពីផលចំណេញសម្រាប់អាហ្សង់ទីនផ្ទាល់ ក្នុងការវិញត្រឡប់ទៅចូលរួមជាមួយប្លុក BRICS វិញ»។

សូមបញ្ជាក់ថា ក្រុមប្រទេសកំពុងអភិវឌ្ឍន៍នៃប្លុក BRICS ដែលពីមុនមានប្រទេសប្រេស៊ីល រុស្ស៊ី ឥណ្ឌា និងអាហ្វ្រិកខាងត្បូង កំពុងស្ថិតក្នុងដំណើរការពង្រីកសមាជិក ដើម្បីទទួលយកប្រទេសផ្សេងទៀត។ បន្ថែមពីលើអាហ្សង់ទីន ប្លុកនេះកាលពីខែសីហា បានយល់ព្រមទទួលយកអារ៉ាប៊ីសាអ៊ូឌីត អ៊ីរ៉ង់ អេត្យូពី អេហ្ស៊ីប និងអារ៉ាប់រួម ជាសកម្មភាពមួយក្នុងគោលបំណងពន្លឿនដល់ការជំរុញរបស់ខ្លួន ដើម្បីកែប្រែសណ្ដាប់ធ្នាប់ពិភពលោកដែលខ្លួនមើលឃើញថា ហួសសម័យហើយ៕